بكل فخر، الشاورما اللبنانية المرتبة ٣ عالمياً ع قائمة أفضل سندويشة بالعالم 

بديسمبر الماضي تم إنتخاب التوم اللبناني كأفضل صوص عالمياً حسب قائمة Taste Atlas الشهيرة. واليوم جبنالكن خبرية حلوة وبيفتخر فيها كل اللبنانية! الشاورما اللبنانية حصلت ع المرتبة ٣ عالمياً ع قائمة أفضل سندويشة بالعالم!

بالإضافة للشاورما اللبنانية (سواءاً اللحمة أو دجاج)، تصدرت القائمة سندويشة Bánh mì من فيتنام بالمرتبة الأولى، و سندويشة Tombik Doner التركية اللي بتحتوي على الكباب بالمرتبة التانية. 

وما في أقرب من الشاورما ع قلب اللبناني! وأبداً مش مستغربين انو طعمة الشاورما اللبنانية دوخت حتى حكّام وخبراء التذوق عند Taste Atlas، وع فكرة هني بيقيّموا الأكل بمعايير عالية جداً ومن بين آلاف الأكلات الإستثنائية التقليدية من كل أرجاء العالم. 

وبتعريف Taste Atlas لأكلة الشاورما اللبنانية، بيقول “صارت الشاورما اليوم أكل الشارع العربي الأول، الموجود مش بس بالجزيرة العربية والشام، ولكن بكل زاوية من زواية هالعالم.” وهيدا دليل انو الشاورما ع أنواعها إكتسحت الدني بطعمتها الشهية وبتمثل السناك الألذ عند الملايين حول العالم!

ومنقول مبروك للمطبخ اللبناني اللي وصل للعالمية، ولبلدنا لبنان كلو! 

ولتعرفوا وين فيكن تجربوا أطيب شاورما ع أصولها، شوفوا قسم الشاورما ع الموقع هون.