٧ محلات خرج ترويقة بجبيل!

ما في شي أطيب من الترويقة عبكرا الصبح وكيف إذا كانت هالترويقة بأقدم وأعرق مدينة بلبنان، نايمة على البحر وحاملة آثار وفيها سوق عتيق وقلعة وسنسول ومطاعم ومحلات ومعارض فنية وأشغال حرفية وكل شي بيخطر عبالكن.

اليوم رح ناخدكن بجولة على ٧ محلات خرج تستسمتوا فيهن بترويقة غير شكل بقلب جبيل.

١. خان حببل

على مدخل السوق العتيق ناطركن هالمحل التراثي لي عندو كل الأكلات التراثية اللبنانية وبقدملكن ياهن على صنية قش متل صنية التيتا لتستمتعوا بكل لقمة وما بتكمل القعدة من دون فنجان شاي أكرك عجم.

الرقم: 599 544 09

٢. E Baladi

قاعد بنص السوق العتيق وجار القلعة، عم بقدملكن الأطباق اللبنانية البيتوتية من المناقيش للجبنة واللبنة والبيض مع خضرا والحلوم وأكيد مع فنجان قهوة تركية على الأصول.

الرقم: 227 542 09

٣. Haven the Cabin

منظر خرافي من فوق بيخليكن تحلموا وتسرحوا بأفكاركن، بتطلبوا سندويش فيتا أو حلوم وبتقعدوا على البلكون وبتشوفوا جمال خلقة ربنا. فيكن تطلبوا قطعة حلو بس تخلصوا وما تنسوا تجربوا التشكيلة الواسعة لي عندن من القهوة.

الرقم: 157 576 76

٤. Ayla by Ayloul

هيدا المحل المهضوم عندو قعدة مميزة على الترويقة، بحضرلكن كل أنواع القهوة لي بتشتهوها مع ترويقة غير شكل من اختياركن متل اللبنة والسندويشات والبيض عيون، الفيتا، الزعتر والقاورما على أنواعها وقصص ولا أطيب من هيك.

الرقم: 222 677 71

٥. Bake In

بيعملوا كل شي بالعجين، عجينة كتير طيبة وبيستعملوا منتوجات محلية وكتير طازة. عندن مناقيش وبيتزا ولحم بعجين وقصص بتستحلوها على الصبحية. ولي بحب الكعكة الطرابلسية رح يشبع قلبو هون وأكيد ما تنسوا فنجان القهوة.

الرقم: 555 464 76

٦. كانتين

الترويقة بجبيل غير شكل وكيف إذا كانت عند كانتين، القعدة على البلكون بتكلمها الأطباق الغنية من الكعك على أنواعو لأطباق الحلو من الكريب والبودينغ والكيك مع فنجان قهوة، شاي أو عصير.

الرقم: 777 944 70

٧. كروسان بار

عشاق الكروسان عندن محل خص نص بقلب السوق، هالمحل بقدم كل أنواع الكروسان لي بتخطر عبالكن وكل شي محضر على إيدين وفيكن تغطسوا كل لقمة بفنجان الكابتشينو لتحسوا بالطعمة الرهيبة. جيبوا كتابكن المفضل وبلشوا نهاركن بسوق جبيل العتيق، ييكفي إنو نقول إنو تجربه فريدة من نوعها.

الرقم: 305 488 81

شوفوا كمان، سمعتوا عن أوتوكار المدرسة لي صار مطعم ببيروت.