إم شريف رح تفتح محل جديد بوسط بيروت

عم تحضروا حالكن لـمحل إم شريف الجديد؟ اسمو ديلي إم شريف وبيقدملكن تجربة إستثنائية بعالم الأكل اللبناني ومن قلب العاصمة بيروت!

سندويشات، مربى، مونة، ووجبات خفيفة جاهزة من مطعم ام شريف المحلي المحبوب رح تكون ناطرتكن بهالمحل الجديد بوسط بيروت. تحت شعار “Beirut mon amour”، رح يكون هالمطرح إضافة جديدة ومكملة لسلسلة المطاعم، ورح توصل بالوقت المناسب، أي خلال رمضان!

الصور الترويجية ما بتخبرنا كتير، بتظهر خيار محشي (ممكن يكون كبيس؟) وشوية فريز ممكن لتحضير المربى.

ونحنا مناخد التلميحات عن المحل الجديد ببيروت من مطعم Em Sherif Deli بلندن! هونيك عندن خدمات مميزة، فيكن تاخدوا مازة اللي بتحبوها من حمص وفتوش ومتبل ع السريع Takeaway، وحتى هالفرع عندو بار لتعملوا فيه صحنكن الخاص أو سندويشتكن اللي بدن ياها، وحتى في حلويات مغلّفة ومحضرة قبل فيكن تاخدوها معكن من مهلبية و مغلي. هل معقول نحصل ع نفس التجربة بفرعن الجديد ببيروت؟ عالحالتين، نحنا مأكدين انو ح تكون تجربة شهية ومميزة!

سلسلة مطاعم  Em Sherif اللي بلشت مع السيدة اللبنانية ميراي حايك وشغفها بالمطبخ اللبناني، بتعبر عن قصة نجاح لبنانية حقيقية. مع ٢٠ مطعم في ١٢ موقع، بما في ذلك لندن وموناكو والكويت والإمارات، صارت هيدي العلامة التجارية سفيرة الأكل والضيافة اللبنانية بكل أنحاء العالم.

شوفوا كمان، ١١ طبق فتة مميز بلبنان ووين فيكن تجربوهن