٥ مطارح بالطبيعة خرج نزهة بلبنان

بما انو قرب الربيع وفتنا ع الطقس المشمس والحلو، كلنا بيخطر عبالنا نضهر بالطبيعة. هيك نفرش الحصيرة، مع الأكل الطيب والفواكة، والناس الطيبة. اليوم لقينالكن ٥ مطارح بالطبيعة خرج نزهة بلبنان. 

1. مطعم بيوماس، جربتا

مطعم بالهوا الطلق، بيقدموا أكلات لبنانية بيتوتية، ملعب للولاد،  ومساحة خضرة بين الشجر مثالية لنزهة مع أحبابكن أو ع بوفيه نهار الأحد  مع العيلة.

الرقم: 532 532 03

2. Rasmaska Gardens، طرابلس

حدايق راس مسقا ناطرتكن ع بساط من العشب والخضار بالشمال، بيطلع عبالكن تكتشفوها أو تستمتعوا بنزهة مع أحبابكن تحت فيّاتها. 

الرقم: 470 170 79 

3. منطقة عيون أرغش – بعلبك الهرمل

منطقة عيون أرغش هي منطقة بين الجرود فيها واحة خضرة غنية كتير ببرك الميّ، الينابيع الغزيرة، والعيون الصافية، والميّ كتير نضيفة لأنو مصدرها التلوج الدايبة. وكتير حلوة وخرج نزهة بالطبيعة! 

4. بحيرة تعنايل، تعنايل

بتفرشوا الحصيرة والأكل على ضفاف هالبحيرة، حولكن البط والوز والهوا عم يلعب بين الشجر العالي، تجربة كتير حلوة بقلب الطبيعة البقاعية الساحرة!

Via @hiba.aub

5. أرصون فيلدج – المتن

محل روعة لتخييم بقلب أكواخ خشب أو تنبسطوا ع نزهة بالغابة. بتلاقوا عندن طاولات كبيرة وألعاب للولاد ونشاطات لكل حدا حابب يعمل بيكنيك مع العيلة أو جمعة أصحاب.

الرقم: 111 228 71

خبرونا، أي من هالمطارح بتختاروا لتعملوا نزهة بلبنان؟

شوفوا كمان، لقينالكن ٣٠+ مطرح بالطبيعة لأحلى مشوار هالربيع