٣ قهاوي فتحوا جديد ببيروت!

لكل عشاق القهوة ولي بحبوا يزوروا كافيهات جداد، إذا عبالكن محل جديد ومهضوم وزهقتوا من المحلات القديمة، اكتشفوا معنا اليوم هالكافيهات الجداد بقلب بيروت لتتمتعوا بجرعة كافيين مع قطعة حلو عبكرا الصبح لتشرجوا لنهار مليان وحافل بالشغل.

١. شفة، وسط بيروت

لما بتكونوا عم تتمشوا بوسط بيروت، بتلاقوا هالمحل القريب من القلعة الصليبية والآثار الرومانية، هالكافيه فاتح جديد، وإسمو “شفة“.

إذا كنتوا من الأشخاص يلي بيحبوا يبلشوا نهارن صح الصبح مع قهوة وقطعة بسكويتة هالمحل إلكن. المكان شيك و عصري، الديكور بسيط ومريح، كتير خرج صبحية قبل الشغل.

الرقم: 677 956 81

٢. بلاش بيروت، الجميزة

عشاق القهوة والشاي، تعو ع “بلاش بيروت”، محل جديد ومكنكن بالجميزة. الديكور بتطغي علي الألوان الترابية مع طاولات رخام مهضومين، وعندو تجربة شرب القهوة مميزة، وكمان فيكن تختاروا تشربوا الشاي، وترفقوهن مع وجبات خفيفة أو تجربوا غير مشروبات.

مناسب كتير للناس يلي عبالن يرفعوا معنوياتن الصبح، وبالنسبة للقهوة، في عندن أنواع خاصة فين ما بتلاقوها بغير مكان. كمان في معارض فنية بهل كافيه، بهدف يخلقوا جو تواصل بين الناس.

الرقم: 896 681 71

٣. Lundi، مار مخايل

بتكرهوا نهار الاثنين؟ ما تعتلوا هم، هالكافيه المهضوم رح يغيرلكن رأيكن.

الجو عندن دافي ومليان حب، ومناسب كتير للناس لي عبالن يبعدوا شوي عن الضجة ويرتاحوا من ضغط الشغل بالمكتب. مش بس القهوة طيبة، في كمان أكل كتير لذيذ مع فنجان القهوة. الديكور بسيط وعملي، في طاولات وكراسي مريحين، وعندن كمان تشكيلة منوعة من المشروبات الباردة والسخنة، وممكن تاخدوا سندويش خفيفة أو صحن لبنة مع القهوة أو تاخدوا قطعة كوكيز طازة شغل المحل.

الرقم: 474 612 81

شوفوا كمان، أكتر من مطعم… تجربة: مطعم رومانسي على شكل قطار!