٥ أفران مهضومة وخرج سردة بالبترون

وين عبالكن تكزردوا اليوم؟ الطقس حلو والشمس برا بتفرفح القلب، مشوا معنا على البترون! شوفوا معنا الأفران المهضومة بمنطقة البترون يلي بتعمل أطيب معجنات وخبز على الأصول. خذوا منقوشتكن، تمشوا حد البحر واشربوا ليموناضة.

١. فرن البركة

مناقيشن مميزين بعجينة طرية ومكونات لذيذة وخاصة بتخلي كل لقمة أطيب من التانية. زعتر، جبنة، لحمة، دجاج، خضرا، في كل شي عا الطلب! بس توصلوا رح تلاقوا قعدة مهضومة كتير متل قعدة البيت ناطرتكن، بتقعدوا بتاكلوا مناقيش، بتتلذذوا بصحن الخضرا من الجنينة وبتشربوا فنجان شاي.

الرقم: 708 954 76

٢. فرن كوكو

من أكتر من ٦٠ سنة، فرن كوكو عم بقدم أطيب المخبوزات، وصار مشهور كتير بالبريوش الطري، السخن والطازة. بريوش سادة أو مع شوكولا، شو عبالكن اليوم؟ بس هيدا مش كل شي، فرن كوكو بيقدم كمان مناقيش، خبز، معجنات، كل شي طيب! ما تنسوا تجوا على معدة فاضية لتجروا أكتر من صنف، في شي أطيب من عجينة محشية شوكولا مع القهوة الصبح؟ ومن بعدها تمشاية بسوق البترون وعالبحر؟

الرقم: 314 430 03

٣. فرن الرحباني

هالفرن موجود بالسوق العتيق بيتميز بقعدة مهضومة ومكنكنة ولقمة طيبة. بتلاقوا كل شي عند فرن الرحباني، من الفطاير واللحمة بعجين والسمبوسك والمناقيش وكل المخبوزات الشهية. لازم تجربوا منقوشة “الزعتر رولز” عندن، وفي كمان أنواع كتير من المناقيش لي بتناسب كل الأذواق. الصبحية والقعدة بهل محل شي ما بينتسى مع كل هل أكل الطيب وإذا مستعجلين ومش حابين تقعدوا فيكن تاخدوا حبة بريوش على الماشي.

الرقم: 829 877 70

٤. فرن دلال شبطين

فرن دلال فرن عيلة زغير موجود بضيعة شبطين بالبترون يلي هيي كتير قريبة، بيعمل أطيب مناقيش ومورقة. ما بيكمل صباحكن من دون أطيب مناقيش من عندن مع شفة قهوة، وكمان عندن معجنات أشكال ونكهات بتجنن. القعدة عند هالفرن مهضومة كتير فيكن تستمتعوا بالمقاعد الملونة والمرجوحة وبالطقس الحلو.

الرقم: 778 882 78

٥. فرن مرشاق

كتير مشهور! الناس بتجي من كل لبنان لتاكل مناقيش ما في متلن عندن. صرلوا من سنة ١٨٦٨، يعني من أكتر من ١٠٠ سنة، وفرن مرشاق عم يخبز ويقدم مناقيش ما في أطيب منن. مناقيش عادية متل الجبنة والزعتر، لمناقيش محشية كتير لذيذة متل صاروخ الدجاج وصاروخ الكفتا. ما تنسوا تطلبوا أطيب فنجان قهوة وشاي مع المناقيش والبيتزا والفطاير وفيكن كمان تطلبوا مشطاح صخن من الفرن.

الرقم: 050 740 70

شوفوا كمان، ٧ مطاعم أرمنية لازم تجربوها بلبنان!