١٠ محلات بلبنان بتعمل برغر متل برغر كينغ وأطيب!

كلنا معودين على برغر كينغ بس يجي عبالنا ناكل برغر بس مش الكل بيعرف إنو في محلات جديدة وقديمة فتحت من سنين شغلتها وعملتها تتفنن بتحضير البرغر من البابوج للطربوش، لهيك حضرنالكن ليستا من ١٠ محلات محلية بتعمل برغر وبس، كلها منيحة لكل يلي حابب يقاطع!

١. Burger Lovers، المنصورية

منظرهم بشهي على الآخر! بقدم كل أنواع البرغر مع إضافات كريمة وكبيرة من غير عالم. انشهر كتير بأكلو الروعة وأسعارو الأروع.

الرقم: 838 848 71

٢. لا بورغيريا

للناس يلي بتحب التفنن بالبرغر، هيدا المطعم ممتاز لإلكن، بيعمل كروسان برغر بشهي وبيقرش قرش. ما فينا نوصفلكن قدي غير شكل! غير هيك، عندن أكتر من نوع من البرغر وصحن البطاطا عندن شي بشهي وفيكن تدعموا البرغر تبعكن كمان بقبرة جبنة.

العنوان: بادارو، الكاسليك
الرقم: 379 397 03

٣. Gilbert’s Burger Bites

هيدا المحل بقدم برغر طعمتها ولا أطيب، والأحلى من هيك إنو بقدم بطاطا مع توم بتشق القلب وشوفوا السبايسي تشيز ملا اختراع.

العنوان: الكاسليك، طبرجا.
الرقم: 471 907 76

٤. Addict Burger

ما فيكن تقطعوا بالضاحية بدون ما تجربوا هيدا المحل يلي جايبلكن أطيب أنواع البرغر. مين بعد مش مجرب البرغر على لحمة عندن؟ أسطورة الأساطير!

الضاحية: 688 615 03
النبطية: 363 076 81

٥. مانشيز

جوعانين؟ عبالكن لقمة طيبة وسريعة، هالمحل بلبيلكن قلبكن، البرغر عندو قصة من الحشوة للخبزة للصوص الروعة.

خلدة: 464 021 03
الجميزة: 566 033 03

٦. The BBQ House

انشهر بأكلو الطيب والمتنوع. مش مبالغة إذا قلنا عن هيدا المحل إنو بقدم برغر خيالية بكل أنواعها بالطعمة والشكل والريحة الطيبة والصلصة المدعومة منيح!

جناح: 558 822 01
شياح: 057 555 01

٧. Cosmic Burger، الجميزة

هيدا المحل المعروف بالبرغر الغنية وغير عادية يلي بيعملها! اللحمة كتير طيبة وكل المكونات طازة.

الرقم: 979 991 76

٨. B for Burger، مونو

موجود بمطرح مخبى بواحد من شوارع مونو المعجوقة. متل إسم المحل، إختصاصو البرغر، وفيكن تطلبوها بالدجاج أو بفطر، أو بلحمة أو شو ما عبالكن، الطعمة رح تاخدلكن عقلكن.

الرقم: 224 399 81

٩. Burger Shot، الضاحية

ما بتكمل الليستا من دون ما نذكر هالمحل، هوي مطعم مشهور بالبرغر الكبار يلي بيعملن، لحمتو طرية، خبزتو بتجنن وبتشهي ومكوناتو كلها طازة، فالنتيجة وحدة برغر من العمر!

الرقم: 706 172 71

١٠. Bite Burger’s، بشارة الخوري

محل مهضوم ببيروت بقدم برغر وسندويشات مدعومة منيح وعلى طريقة البيت مع بطاطا مقلية من غير عالم! مكونات شهية وخبزة ولا أطيب.

الرقم: 651 972 81

شوفوا كمان، ٥ محلات لأطيب عرايس سجق ببيروت!