٥ أوتيلات ومنتجعات صحية ممكن تزوروهن بالجبل بلبنان!

حلوة فكرة نومة بالجبل، وسط الطبيعة الخلابة والهوا النقي، بس شو أجمل من هيك؟ تجربة مساج كتير حلوة بتدلكوا جسمكن وبتخليكن تشعروا بالراحة والاسترخاء!

١. بكرزاي، بعقلين

عند بكرزاي قادرين تتمتعوا بتجربة جبلية من غير عالم، عدا عن النومة بقلب الجبل ببيت حجر بيشبه جزيرة بعيدة عن الناس فيها كل شي، عندن مطعم، محل لتعلم فن صناعة الفخار، وسبا بقدملكن تجربة تدليك خيالية.

الرقم: 020 512 03

٢. أوتيل البستان، بيت مري

أوتيل من أجمل الأوتيلات بالجبل، قاعد بنقطة مطلة على أجمل منظر كلو خضار وجمال ورواق. غير النومة المريحة والأكل الطيب، هالأوتيل عندو سبا مميز مع بيسين شوفي لكل مين عبالوا يغنج حالو ضمن طقس مناخي مناسب.

الرقم: 904 972 04

٣. نومادز Nomads Nature & Nurture، سرجبال

عبارة عن بيوت خشبية بقلب الغابة وحد شلالات سرجبال مع مراجيح معلقة فوق المي، عندن كمان بيت بيشبه بيوت سانتوريني اليونانية. وكمان الأهم من هيك، عندن سبا آسيوي مع معالجين مختصين رح بيهتموا فيكن على الآخر.

الرقم: 709 370 76

٤. ميست أوتيل، إهدن

هالأوتيل رح يخليكن تعيشوا تجربة الفخامة بنص إهدن، من خلال نومة استثنائية ولحظات رومانسية بسبب التصميم الرائع للغرف والمنظر الخيالي من البالكون. غير هيك، عندن مطعم وسبا مميز لكل حدا عبالو يعيش تجربة المساجات المتنوعة ويشعر بالراحة التامة.

الرقم: 222 100 71

٥. غولدين ليلي ريزورت، عاليه

شو رأيكن تروحوا ع فندق وسط الطبيعة الواسعة وتحسوا حالكن بقصص زمان؟ غولدين ليلي ريزورت بعاليه رح ياخدكن لهيك عالم. عندو مطعم بقدم أشهى الأكلات، صالة ألعاب، وأكيد أهم شي: سبا مميز كتير مع حمام تركي رح يخليكن تنسوا كل شي!

الرقم: 015 564 05

شوفوا كمان، ٥ بيوت ضيافة وأوتيلات بين التلوج بفقرا!