١١ طبق فتة مميز بلبنان ووين فيكن تجربوهن

إذا ما بتحبوا الفتة، ما كنتوا كبستوا ع المقال! الفتة كتار تفننوا فيها، وعملوا منها أطباق بنكهات ومكونات متنوعة، وللصراحة كلو طيب. وبما إنكن معنا، خلون نعرفكن على ١١ طبق فتة مميز بلبنان ووين فيكن تجربوهن. 

ملاحظة: بعض المطاعم بتقدم الفتة كطبق يومي، فتأكدوا انو تتصلوا قبل ما تزوروا المحل!

1. فتة اللبن الأصلية

عبالكن الفتة التقليدية من اللبن والجمص والمكسرات المحمصة؟ هالفتة محبوبة عند كل الناس خصوصي ع الترويقة، وفي كتير كتير مطاعم بتقدم هالوصفة بطريقة مميزة وشهية على أصولها. 

وين مننصحكن تجربوا هالفتة؟ مطعم أبو عبد الله ع الدورة أو مطعم فول بيتوتي بحارة حريك. 

الرقم لمطعم أبو عبد الله: 286 256 01 

 رقم فول بيتوتي: 740 474 71

2. فتة دجاج 

فتة دجاج هي المفضلة عند كتار وسهلة تعملوها، عبارة عن مزيج بيشهي من قطع الدجاج مع الرز و اللبن الفريش والحمص والخبز والمكسرات الشهية.

وين مننصحكن تجربوها؟ عند قهوة زيتونة  بالزيتونة باي أو بفرعن بالبترون.

الرقم: 357 370 01

3. فتة كبة لبنية 

هالأكلة رح تاكلوا صبيعكن وراها خصوصي إذا انتو من محبي الكبة. طبق من الكبة القراص، مع لبنية، ورمان وخبز ومكسرات ورشة زيت، منظرها بيشهي!

وين مننصحكن تجربوها؟ كمان عند مطعم قهوة زيتونة بالزيتونة باي أو فروع بالبترون. 

الرقم: 357 370 01

4. فتة سجق

هلق صار فيكن تجربوا طعم السجق الحر والمبهر مع فتة غير شكل! 

وين مننصحكن تجربوها؟ مطعم Batchig للأكل الأرمني بالزيتونة باي أو فرعو بالسيتي سنتر. 

الرقم: سيتي سنتر 307 444 70 – زيتونة باي 654 135 70

5. فتة شاورما

لما تجتمع الشاورما الدجاج مع الفتة باللبن، عرفوا انو هيدا صار فن بالطبخ مش بس أكلة عادية! طعمة الشاورما المشوية ع أصولها، مع التوم واللبن وقرمشة المكسرات، يا عين!

وين مننصحكن تجربوها؟ بتلاقوها عند شاورما أبو صبحي بطرابلس، جل الديب، وبوليفار كميل شمعون ببيروت. 

الرقم: طرابلس 949 500 76 – جل الديب 646 500 76 – بوليفار كميل شمعون 493 500 76

6. فتة ورق عنب

يمكن من أطيب الوصفات لورق العنب لما تجربوها مع الفتة، خصوصي إذا ورق العنب بزيت مغمس باللبن، وطعمتو مع الخبز المحمص!

وين مننصحكن تجربوها؟ عند مطعم بو ملحم بسن الفيل، وحتى عندو تشكيلة من أطباق الفتة بوصفات مختلفة. 

الرقم: 666 497 76 

7. فتة قريدس

بتعرفوا انو فيكن تجربوا القريدس المتبل بطريقة مميزة مع خلطة الفتة الشهية؟ بالعادة بتلاقوها بالمطاعم اللي بتقدم المأكولات البحرية واللبنانية، وكل حدن عندو طريقتو والصوص الخاصة اللي بيستعملها. 

وين مننصحكن تجربوها؟ مطعم ملك البحر ببكفيا أو مطعم بابل بفروعو بضبية، عمشيت، وزيتونة باي، أو مطعم بو ملحم بسن الفيل.

رقم مطعم ملك البحر: 461 701 03

أرقام مطعم بابل: ضبية 546 546 04 – زيتون باي 846 370 01 – عمشيت 999 620 09

رقم بو ملحم: 666 497 76 

8. فتة صفيحة

لعشاق الصفيحة واللحمة الطيبة، لقينالكن أطيب أكلة ممكن تجربوها: فتة صفيحة، والصفيحة أكيد معمولة ع أصول البقاع ومغمسة باللبن. 

وين فيكن تجربوها؟ عند لقيس فارم ما غيرو، وعندو فروع ببيروت وبعلبك وشتورة وزحلة. 

الرقم: بيروت 824 373 01 – شتورة 490 542 08 – بعلبك 029 666 71 – زحلة 490 931 08. 

9. فتة شيش برك

هيدا الطبق إبداع بحد ذاتو لكل محبي الشيش برك،مع اللبن والحمص والمكسرات ورشة زيت بتطلع طعمة روعة!

وين مننصحكن تجربوها؟ بتلاقوا هالطبق عند مطعم بيت كنز بشارع سرسق، وكمان مطعم أنا بيروت بأنطلياس، أو مطعم بو ملحم بسن الفيل.

رقم بيت كنز: 098 777 81

الرقم لمطعم أنا بيروت: 733 888 70 

رقم بو ملحم: 666 497 76 

10. فتة عرايس كفتة

شي مرة مجربين فتة عرايس كفتة؟ عبارة عن عرايس الكفتة المشوية ع الفحم، مغمسة باللبن الطازة ومرشوش عليها زيت وبهارات.

وين مننصحكن تجربوها؟ أكيد مطعم أنا بيروت بأنطلياس.

الرقم: 733 888 70 

11. فتة الباتنجان

فتة الباتنجان بتجمع طعم الباتنجان المقلي أو المشوي مع اللبن والزيت وصوص الحر اللي بيشهي، بتطلع طبق مازة بيجنن. والحلو انو في كتير مطارح بتقدمها!

وين مننصحكن تجربوها؟ مطعم ليزا بالأشرفية إذا بدكن قعدة مرتبة، أو  مطعم أبو عبد الله ع الدورة إذا ع الترويقة، أو قهوة سنفريان بجونية. 

رقم مطعم ليزا: 108 208 01

الرقم لمطعم أبو عبد الله: 286 256 01 

رقم قهوة سنفريان: 055 755 81 

خبرونا، أي نوع فتة حابين تجربوا أكتر شي؟ 

شوفوا كمان،مشتاقين للصيف؟ لقينالكن ٥ مطاعم مع قعدة دافية عالبحر