خبرية بتفرح القلب: كفردبيان عاصمة السياحة العربية الشتوية لعام 2024!

أعلنت منظمة السياحة العربية بلدة كفردبيان اللبنانية عاصمة السياحة العربية الشتوية لعام 2024 وهالخبر إجا بوقت كفردبيان عم بتكون في عمرانة بالسواح اللبنانية والأجانب يلي إجو من كل المناطق والبلدان ليستمتعوا برياضة التزلج والسهرات والحفلات لهالموسم. والكل صار بيعرف إنو الطلعة على كفردبيان عم بتكون عجقة كتير ومسكرة بالسيارات من ورا الإزدحام الكثيف للوافدين من كل محل ومحل.

بين 22 بلد عربي، كفردبيان نالت لقب عاصمة السياحة العربية الشتوية بسبب تلجها الأبيض الناصع وكل جمالها. مش بس بالشتوية حلوة، حتى بالصيفية بتضل كفردبيان مقصد سياحي للزوار من كل مكان وهي الوجهة السياحية الصيفية والشتوية يلي بيتغنى فيها لبنان من زمان وجاه بسبب موقعها القريب من كل الأوتيلات والمنتجعات والAirbnb وبيوت الضيافة عدا عن المطاعم والكافيهات والمواقع التاريخية والأثرية الموجودة بالبلدة.

وللإحتفال بهالحدث المميز، نظمت بلدية كفر دبيان حفل شارك في وزير السياحة وليد نصار والسفير السعودي وليد البخاري وتسلمت في رسمياً البلدية جايزة “كفردبيان عاصمة المصايف الشتوية العربية لعام 2024”.

بس في سؤال منطقي بيخطر على بالنا اليوم: مش مفروض كفردبيان هي البلدة العربية الوحيدة الشهيرة يلي فيها تلج وبيستات للتلج بين بلدات البلدان العربية؟ على كل حال ألف مبروك، كفردبيان بتستاهل هالجايزة وهالتقدير وأكتر من هيك!

مبروك لكفردبيان، مبروك للبنان ومبروك لكل لبناني وخصوصي لعشاق التلج والسكي!

_{الصورة الرئيسية من موقع رويد تريب.}

شوفوا كمان، بتصدقوا في تيكتوكر بتعمل reviews للحمامات بلبنان؟