بالفيديو: زرنا ضيعة لبنانية مهجورة عمرها ١٠٠ سنة

ع قد ما غني تاريخ بلدنا لبنان، ع قد ما منلاقي جواهر تاريخية مخفية مخبية ألف قصة وحكاية. اليوم قررنا ناخدكن ع مطرح بعيد عن العالم شوي بجبل لبنان ونصورلكن شو لقينا. مشوا معنا نكتشف ضيعة لبنانية مهجورة عمرها ١٠٠ سنة!

هالضيعة مخباية بمنطقة معزولة بجبل لبنان بيقولو عمرها ١٠٠ سنة وقريبة من عمشيت، واسمها “بجرين”. من الصعب شوي توصلولها لأنو أرضها وعرة ، حولها التلال الخضرة والسهول الممتدة ع مساحات واسعة من سفوح الجبل. يذكر انو السبب الرئيسي لهجران الضيعة هي المجاعة اللي صارت بجبل لبنان. وضلّت هالمجاعة من سنة ال ١٩١٥ حتى ١٩١٨، وكانت السبب للموت المأساوي لحوالي ٢٠٠،٠٠٠ شخص. فكان من الطبيعي تلاقوا ضيع لبنانية إنهجرت، وبيوت إنخربت، وعيل قررت تهاجر من البلد وتبني حياتها من أول وجديد برا. 

من أبرز معالم هيدي ضيعة مهجورة هي كنيسة أثرية وقديمة ما حدا بيعرفها عمرها إلا اللي كان قاعد بهالضيعة. وبالرغم انو مهجورة بتلاقوا فيها شموع، صليب بعدو محلو، والمقاعد الخشبية اللي أكلتها الغبرة. شوفوها بالفيديو هون:

@beirut.com Exploring a ghost town that was abandoned during the Great Famine in Mount Lebanon. #beirut#fyp#lebanon#fyp#urbex#village#abandoned ♬ Don't Panic – Coldplay

بتكفوا مشي شوي لقدام وبتلاقوا جنب الكنيسة بيوت مهجورة ومدمرة ما بقي منها إلا صخور وحيطان مهدمة. مشهد بيخليكن تتخيلوا كيف كانت العيشة بهالضيعة قبل ما تنهجر، مين العيل اللي سكنت فيها، وكيف كانت آخر لحظاتن بهالموقع اللي صار مجرد آثار اليوم.

من أكتر الأشيا اللي ممكن تدهشكن بقلب ضيعة مهجورة هو المنظر الجبلي اللي بيطل على جمال مدينة بيروت والساحل من بعيد. وبخليكن تفكروا لو هالضيعة كانت بعدها صامدة لليوم، أديه كانت رح تجذب ناس بسبب موقعها الإستثنائي؟

خبرونا، حبيتوا المشوار على ضيعة لبنانية مهجورة؟

شوفوا كمان،إنطلقت منو مسابقات الجمال وبعدها إنهجر، شو قصة فندق القاصوف؟