٩ كافيهات مكنكنة بالضيعة

كافيهات الضيعة عندها سحرها الخاص، فيها بتعيشوا نوستالجيا الضيعة مع ريحة القهوة والقعدة الدافية حد الصوبيا مع قطعة حلو، بتسمعوا صوت الشتي وبتتفرجوا على التلج عم ينزل شوي شوي من الشباك المأزز إنتو وقاعدين دفيانين. ولأن هيدا الطقس بدو شوية دفا وحنية رح نبرمكن على ٩ كافيهات بالضيعة.

١. كوبا كافي، القبيات

بقلب ضيعة شمالية مخبى هالكافي وعندو قعدة لذيذة ومكنكنة بالساحة. هون رح تنتعشوا وتشربوا قهوة محضرة على الإيد بفن، فيكن تنقوها باردة أو سخنة وفي عندن كمان حلويات مهضومة كتير طالعة من الفرن وبوظة.

الرقم: 840 351 06

٢. كافي عيروت، إهدن

هيدا الكافيه المهضوم بتلاقوا بساحة الميدان بين التلجات. قعدة مكنكنة مع فنجان سحلب بدفي القلب، شوية قرفة، كعك وبسكويت وكورن فليكس. بتقعدوا بنص الضيعة وبتتفرجوا على المنظر لي حواليكن مع شي كتاب مهضوم بإيدكن.

الرقم: 884 383 03

٣. كافي ورد Ward Café Trottoir، حدث الجبة

قعدة حد الصوبيا مع فنجان قهوة وكاس نبيد والتلجات قبالكن وأكل بلدي على الفخار. مناقيش وبيض وطبخات بيتوتية وقعدة بتشبه قعدة البيت رح تخليكن تنسوا همومكن شوي زغيرة وتحسوا بدفا الشتوية.

الرقم: 652 621 03

٤. كافي دي سيدر Café des Cèdres، الأرز

قعدة بقلب غابة الأرز مع أطيب المأكولات وبوج التلجات. القهوة إلها طعمة خاصة بس تكون بهيك جو. فيكن كمان تقصدوا على الترويقة وتعملوا صبحية مع أصحابكن قبل ما تكفوا على السكي.

الرقم: 797 448 70

٥. كافي رويال، جزين

هالكافي المهضوم من أكتر الكافيهات المكنكنة بالضيعة، عدا عن قعدتو الدافية، بتلاقوا عندو ألعاب مهضومة خرج عيلة أو أصحاب يقضوا وقت ويتسلوا. وأكيد ما فينا ما نخبركن عن قهوتو قدي طيبة وبيتوتية.

الرقم: 096 780 07

٦. كافي بو ملحم، حمانا

بتقصدوا لتشربوا قهوة مع أكل بيتوتي ولتقعدوا على الكراسي الخشب. بيتخصص هالمحل بتقديم القهوة على أنواعها وبيشتهر بسلطاتو الشهية وطبق الكنافة.

الرقم: 687 946 03

٧. قهوة السوق، بعقلين

عندن القهوة ع أصولها، هيك بيقولوا ولاد الجبل. قهوة السوق بتقدم متة على طريقة أهالي الجبل، أكل بيتوتي وجو مهضوم، كعك وقهوة وجريدة وأغاني فيروز كل يوم الصبح. القهوة محمصة منيح والريحة بتفتح النفس لعشاق الرواق الصبح وراحة البال.

الرقم: 618 300 05

٨. روستيك كافي بار، فاريا

اشربوا قهوة بين تلجات فاريا مع الشموع والمنظر الأبيض قبالكن… شي متل الحلم. قهوة دافية، حكايات حلوة، والمنظر قدامكن بحسسكن بالرواقان. ما في أجمل من صوت الشتي بهالمكان، عندن مخبوزات بتشهي، كنافة وكل أنواع الجبنة وحتى الفوندو.

الرقم: 116 168 76

٩. أبواب، جباع

بيت ضيعة من الحجر العتيق وقهوة على الببور، بتقعدوا على كراسي خشب قديمة تحت الشجر أو جوا، بتاكلوا أكل بيتوتي بصحون روميو وجوليت والأكل بيوصل لإلكن بالفخارة تبع جدو وتيتا. عندن كمان مكتبة زغيرة مهضومة فيها كل شي كتب وجرايد شي عتيق وشي جديد لتستأنسوا منيح.

الرقم: 070 811 81

شوفوا كمان، ٥ مطاعم صينية لازم تجربوها بلبنان.