انتو سينغل ع الفالنتاين؟ لقينالكن ٨ شغلات تعملوها لحالكن ببيروت

للصراحة، كتار منا سينغل ع الفالنتاين وممكن ما رح نضهر ع محل. بس نحنا لقينالكن ٨ شغلات تعملوها لحالكن ببيروت لتغيروا جو وتتسلوا من دون ما تعوزوا حدا.  

1. زوروا كافيه مونز بالجميزة مع حيوانكن الأليف وإطلبوا شي إلكن وإلو

هالكافيه المهضوم عندن منيو من قهوة وحلويات وحتى سناكات، وحتى منيو إذا معكن حيوانات أليفة. عدا انو بيقدموا “كبسة طربوش”، عبارة عن قهوة إسبرسو مع سناك الطربوش اللي ح يذكركن بطفولكتن وينسيكن شوي إنكن سينغل. 

2. جربوا أطيب الطبخات اللبنانية عند مطعم دار بيروت بالجميزة

بتجربوا شيش برك، كوسى محشي، أطباق الكبة، وملوخية ورز، وكل اليخنات طيبة عند دار بيروت. الأكل عندن رح يدفيكن بهالطقس ويحسّسكن شوي بحنان الماما لأنو أكيد إشتقتولها. 

الرقم: 888 011 76 – 888 571 01 

3. إحضروا عرض ستاند أب كوميدي مع منصة موقف 

منصة Open Mic جديدة ببيروت، بيعملوا مختلف العروض الفنية ع خشبة المسرح متل الموسيقى والشعر والتعبير الحر وغيرو. بس نحنا إخترنالكن ستاند أب كوميدي بس كرمال تفردوها وتضحكوا شوي.

الرقم: 796 087 70 

4. إسهروا عند Aaliya’s Books بالجميزة وجربوا ليلة “بيتزا ونبيد”

هالكافيه والبار بيقدملكن نشاطات وسهريات متنوعة بتناسب الكل، عدا عن مكتبة مليانة كتب لتتطلعوا عليهن، مطرح مميز لتتعرفوا ع ناس جديدة وتغيروا جو. 

الرقم: 375 566 01 

5. إطلبوا أفخم سندويشة شاورما دجاج مع طربوش التوم من عند أبو صبحي

أبو صبحي سناك الشاورما الشهير اللي إجا من طرابلس ع بيروت وصار عندو كذا فرع بالمدينة. صدقونا ما رح تفكروا تشاركوا سندويشة الشاورما من عندو مع أي حدا! 

الرقم: جل الديب 646 500 76 – بوليفار كميل شمعون 493 500 76

6. نمّوا موهبتكن بالرسم ع ورشة مميزة عند Vernice بقريطم 

طريقة حلوة لتتسلوا وتستفيدوا بنفس الوقت، وكمان بيقدموا مشروبات وسناكات وحلويات لتكمل قعدتكن. ولما تخلصوا، شوفوا قسم الإكسسورات عندن وإشتروا لحالكن هدية. 

الرقم:  455 599 71

7. مزمزوا بقهوتكن لحالكن وبكل رواق عند Curl كافية بدارو

هالكافيه زغير وكوزي وما فيه ناس كتير، مميز للناس اللي بتحب تقضي وقت لحالها مع فنجان قهوة وكتاب. 

8. دللوا حالكن ب Spa Day كوري عند Hoore 

يمكن هالشي أحلى شي ممكن تعملوا، جلسة عناية بفروة الراس والشعر بإستخدام التقنيات الكورية، وكمان مع مساج للرقبة والجسم. بتلاقوا مركز حور تحديداً بالطيونة. 

الرقم: 513 635 81 

شوفوا كمان،وين بتلاقوا ورشات فنية ببيروت؟