٩ أوتيلات ومنتجعات مكللة بالتلج بلبنان!

ما في أجمل من القعدة بالأوتيلات خصوصي لما تتلج الدني والعالم تزور هالأوتيلات لتمارس رياضة التزلج وتتفرج على التلج، لهيك اليوم قررنا نعملكن برمة على أجمل الأوتيلات المغطاية بالتلج بلبنان.

١. أوتيل سنولاند Snowland Hotel، قناة بكيش

عبالكن تقضوا يومين حلوين بالتلجات؟ هيدا الأوتيل محاوط بالتلجات، وعندو كمان بيستات للسكي، غرف دافية من جوا ومنظر أبيض.

الرقم: 300 345 03

٢. أوتيل لو سيدروس Le Cedrus Hotel، الأرز

عم بتدوروا عالهدوء والتلج؟ هون بتكونوا حد الأرزات وببتفرجوا على التلج الأبيض. غرف خشبية، شيميني، وعشا كتير مميز حيخليكن تحسوا حالكن بسويسرا.

الرقم: 777 413 70

٣. أوتيل نيرفانا Nirvana Hotel & Spa، اللقلوق

نفسيتكن تعبانة وعبالكن تروقوا راسكن عالآخر؟ هالأوتيل المميز مش بس بأمن منامتكن بقلب جبال فقرا، كمان بقدملكن كل الخدمات لي بتحلموا فيها متل الجاكوزي السخن مع التلج الأبيض قبالكن.

الرقم: 112 441 03

٤. وايت سيدر أوتيل White Cedar Hotel، الأرز

مش بس إسمو أبيض، كل شي هون مكللل بالتلج! الكبار والزغار بيجوا بيعملوا سكي وبترجعوا بتتدفوا جوا حد النار إنتو وعم تقروا كتاب. بالليل، بتتفرجوا على التلج الأبيض ونجوم السما وبتناموا دفيانين. رحلة شتوية حلوة ومريحة من أولها لآخرها.

الرقم: 394 493 70

٥. أوتيل ميست MIST Hotel & Spa، إهدن

تخايلوا حالكن قاعدين والتلج حدكن دغري… أكل طيب، أوض مريحة ودافية ومطعم مميز. بالليل، بتشوفوا منظر كل إهدن مكللة بالبياض، منظر كأنو لوحة مرسومة!

الرقم: 222 100 71

٦. أوتيل تشيري بلوسم Cherry Blossom Hotel، بحمدون

إذا بدكن تنعزلوا عن العالم وتعيشوا بمحل مريح، ما إلكن غير هالأوتيل لي هوي عبارة عن بيت حجر مغطى بالقرميد بياخدكن برحلة جبلية ساحرة. مكان مثالي لعيلة زغيرة بتحلم بعطلة شتوية حلوة ومكنكنة!

الرقم: 770 129 71

٧. أوتيل بروفانسال Hotel Provençal، إهدن

أوتيل حجر، حلو كتير بيشبه القصور التراثية ومكلل بالتلج داير من دار، مش ضروري تروحوا عسويسرا حتى تحسوا بروح الريف السويسري! هون الغرف مرتبة، الأكل بيتوتي كتير لذيذ، والجو جبلي وحتى الهوا غير عن هوا بيروت.

الرقم: 040 561 06

٨. شاتو دو Château D’eau، فاريا

هالأوتيل قاعد بنص جبال فاريا وبقدملكن نومة جبلية ساحرة، ما في أجمل من الشعور بس تكونوا دفيانين والدني برا سقعة وتلج. هون بتكونوا قريبين على بيستات التلج وحتى فيكن تعملوا تمشاية بالتلجات بس يجي عبالكن.

الرقم: 595 875 78

٩. أويتل تير برون Terre Brune Hôtel، فقرا

هالأوتيل عندو قعدة دافية بنص التلجات، بتطلعوا على فقرا بالشتوية وبتقضوا نهار غير شكل وبتنبسطوا بأكل سخن وبشهي من الستيك والفوندو حد الشوميني مع أطيب كاس نبيد والنومة مع منظر بيخطف القلب.

الرقم: 301 030 03

شوفوا كمان، ٧ من أغرب المباني الموجودة بلبنان!