بتتذكروا أشهر مسلسل مكسيكي بلبنان: كان بس ينعرض تفضى الطرقات!

بتتذكروا شو كان أشهر مسلسل مكسيكي بلبنان؟

الجيل الجديد ما لحق موضة المسلسلات المكسيكية بس أكيد لحقتو ظاهرة المسلسلات التركية. بس للجيل القديم المسلسلات المكسيكية كان إلها طعمة خاصة وكان الكل بدون استثناء، كبير وزغير، ينطروها مناطرة كل يوم. لدرجة صارت بيوت كتيرة تسمي ولادها أسامي مستوحاة منهن متل متل كريستا ماريا، أنا ماريا، فاليريا، ميغيل وغيرن كتير.

بس لما ننبش الماضي والذكريات الحلوة، في مسلسل واحد كسح الدني، لدرجة إنو بوقت ما كان ينعرض ما كان حدا يطلع من بيتو وكانت كل الناس تتصبر ورا شاشة التلفزيون ويحضروا حلقة ورا حلقة. رزق الله ع هيديك الإيام شو كان فيها خير وبسط!

أكيد عم نحكي عن المسلسل المكسيكي الشهير ماريا مرسيدس.

سنة 1992، عرضت محطة الـLBCI أول مسلسل مكسيكي “مهما كان الثمن” على شاشتها، ومن بعدها المسلسل الشهير “ماريا مرسيدس” بطولة النجمة تاليا وأرتورو ولي كان يتألف من 85 حلقة.

هالمسلسل المكسيكي اللي انعرض بالتسعينات، كان بمثابة ظاهرة اجتماعية بلبنان.

القصة كانت عن بنت فقيرة إسمها ماريا، كانت بتبيع اللوتو بالشارع لتعيل إخوتها، بس ع حظها الحلو، بتتعرف على رجل وبيتجوزوا. بس ماريا مرسيدس ما كانت عارفة إنو جوزها تزوج منها نكاية بعمتو.

بعد الزواج، بتنتقل ماريا مرسيدس لتعيش مع عيلة جوزها، وبتوقع بحب إبن عمو، يلي كان مجوز قبل، بس مرتو ماتت.

القصة كانت معقدة، بس هالشي ما خلا الناس يبطلو يتابعوها. تاليا، البطلة، كانت كتير حلوة وطبيعية، ضحكتها كانت بتحلي الشاشة، والقصة كانت مليانة بالأحداث المثيرة.

انغرم فيها معظم شباب البلد بوقتها، والعالم كلها حبت جمالها الطبيعي ونظراتها الحلوين وهيك صار هالمسلسل إدمان عند كتير عالم.

حتى بخبروا إنو قد ما كانت الطرقات والمحلات تصوفر بقوتها، كان يصير في كتير سرقات بوقت عرض المسلسل لأن ما كان في حدا على الطرقات.

واليوم وبعد مرور 30 سنة كل ما بتقولوا “ماريا مرسيدس” لحدا من جيل التسعينات والتمانينات والكبار بصير قلبن يدق وبيتذكروا أحلى الإيام وكيف كانت الحياة ماشية على الهدا بلبنان.

وإنتو، شو كان مسلسلكن المكسيكي المفضل؟

شوفوا كمان، أسطورة الزمن الجميل: مين كانت أول مصممة أزياء بلبنان؟