٥ مطاعم شتوية بقلب كوخ بالجبل

القعدات المكنكنة ما بتحلى إلا بالشتوية لما يكون الطقس برود والدني تلج. هيك بيطلع عبالكن قعدة كوخ مليانة دفى وسكينة. اليوم رح ناخدكن مشوار حلو على ٥ مطاعم شتوية بلبنان بقلب كوخ بالجبل. 

1. Azawardi Laklouk، اللقلوق

مطعم الأزوردي قاعد بقلب كوخ بالجبل بمنطقة اللقلوق التلجية، وبيتميز بقعدة مكنكنة جنب الشاميني وجو بيتوتي ع الدقة القديمة وموديل الخشب. 

عندو أطباق لبنانية بتجربوها ع ترويقة بين التلوج أو عشا دافي بالكوخ. بيتميز بالمازة السخنة الممتازة متل الكبب مع الرمان أو رقاقات الجبنة مع السمسم، السلطات الغنية، والمشروب المحلي.

الرقم: 868 888 76

2. Le Montagnou، كفردبيان

عيشوا أجواء رومانسية بين التلوج هالشتوية من قلب مطعم Le Montagnou المرتب بأحضان كفردبيان؛ هالمطرح عبارة عن كوخ بالجبل بياخدكن على أجمل المناطق التلجية بلبنان لتعيشوا وقت من العمر. 

أطباق من شرايح اللحمة، جبنة فوندو، نبيد أحمر، وعشا فاخر ناطركن بهالمطرح الجبلي الإستثنائي، وفوق هيك عندو فيو ع قمم صنين البيضا. 

الرقم: 441 341 03

3. أوبرج لو فاليه، فاريا

أوبرج لو فاليه مطعم سويسري بقلب جبال لبنان بفاريا، بيسفركن على ريف سويسرا من قلب كوخ خشب مكنكن بين التلوج. 

جربوا أطيب أطباق المطبخ السويسري التقليدي، جبنة راكليت، فوندو، طبق تشاركوتيري من أطيب شرايح اللحمة، عدا عن المناظر الجبلية اللي رح تسحركن!

الرقم: 227 552 70

4. لولا، بكفيا

احجزوا طاولة جنب الموقدة واطلبوا أطيب فوندو مع أكلات دافية وشهية من المطبخ الفرنسي. لولا مطعم جبلي بقلب كوخ فاخر، ناطركن ع قعدة رومانسية بين صنوبر بكفيا. 

الرقم: 706 627 71

5. Ô Bois، خنشارة

هالمطعم محاوط بغابة صنوبر وقاعد بقلب كوخ من الخشب بيتميز بالجو المكنكن والقعدة الرايقة. 

استمتعوا هالشتوية بطبق جبنة فوندو، راكليت، مع خبز وبطاطا مشوية، كلو ع جو رومانسي جنب الشاميني، في أحلى من هيك؟

الرقم: 752 345 03

خبرونا، أي مطعم بقلب كوخ جبلي رح بتجربوا هالشتوية بقلب لبنان؟ ومع مين حابين تروحوا؟

شوفوا كمان، ١٥ مطعم لتدوقوا فوندو الجبنة الدايبة هالشتوية بلبنان