بنص الشتوية: ٩ شغلات تعملوها بضيعة مزيارة!

للي عبالوا يزور محل جديد هالشتوية، اليوم قررنا نعرفكن على ضيعة جبلية مكللة بالأبيض والقرميد الأحمر: مزيارة، ضيعة الغرايب والعجايب، ضيعة المغترب وضيعة الجمال والهدوء والسكينة. تعرفوا معنا اليوم على ١١ شغلة تعملوها بضيعة مزيارة!

١. بلشوا نهاركن بترويقة مهضومة: كريب ع شوكولا لتدفوا بطنكن مع صوص ع الوج وحبة بوظة عند La Crepinette

فيكن كمان تخبصوها عالآخر وتجربوا البيتزا ع نوتيلا الخاصة بالمحل مع عصير شغل إيد

الرقم: 005 657 06

٢. زوروا مزار سيدة أم المراحم يلي يعتبر من أجمل المزارات الروحية بلبنان

بتلاقوا في منحوتات كتيرة وفيكن تاخدوا أجمل الصور

٣. زوروا البيوت الغريبة بالضيعة يلي ما بتلاقوها ب ولا أي ضيعة تانية بلبنان

بلشوا ببيت الطيارة يلي هوي البيت الوحيد بلبنان لي مصمم على شكل طيارة

رجعوا شوفوا البيت لي ع شكل معبد يوناني قديم

وكمان البيت لي ع شكل هرم

٤. شوفوا تمثال المغترب اللبناني يلي هوي بيحكي عن حكاية أهل مزيارة

عدد كبير من سكان مزيارة هاجروا بالزمانات بسبب الظروف الصعبة بس ولا نهار نسيوا أرضن وعمروا فيها أجمل البيوت

٥. زوروا البحيرات المجلدة بالضيعة وتفرجوا على أجمل منظر

٦. مارسوا رياضة السكي الحر بقلب الضيعة

٧. كلوا أطيب صحن مشاوي على اللبناني مع مختلف أصناف المازة عند مشاوينا

الرقم: 145 570 06

٨. جربوا أكلة الهريسة لي تعتير الأكلة التراثية لضيعة مزيارة وبتضيّف بكل المناسبات

مكونة من قمح ولحمة وشوية ملح وكمون مسلوقين بالدست… لقمة جبلية ولا أطيب

٩. وما بيكمل مشوار مزيارة من دون ما تناموا بقلب الضيعة عند أوتيل مزيارة

عيشوا تجربة الهدوء والسكينة بقلب ضيعة محافظة على الأصالة والرقي

والصبح بانتظاركن أشهى ترويقة لبنانية ممكن تتخايلوها

الرقم: 876 453 81

عبالكن تعملوا مشوار حلو ع مزيارة؟

شوفوا كمان، بنص الشتوية: ١٠ شغلات تعملوها بضيعة حراجل.