٩ عبارات مهضومين علمنا ياها جدو وشو بتعني!

ما في أحلى من البساطة بس نكون قاعدين مع الكبار بالعمر عم نسمع حكياتن وخبارن اللي بتضل صدى بذاكرتنا وبترسم ضحكة ع وجوهنا! اليوم رح نرجع شوي عالماضي ونتذكر ١٠ عبارات مهضومين من إيام جدو، وجد جد جدو أكيد سامعينن شي محل بس ما بتعرفوا معناتن، لنرجعكن على عاداتنا الجبلية الأصيلة ونخليكن تحسوا كأنو قاعدين على الفرندا بالضيعة عم تشربوا قهوة مع الجيران وتسمعوا حكي وخبار أهل الضيعة.

^{Credits: A7la Balad Lebnen}

١. يلعب بالكبة والأربعة

عبارة بتطلع عراسنا بس حدا يكون معصبنا. يعني إذا كنت قاعد عم تلعب طاولة مع جارك وزعبر عليك وقلك “ما هاي اللعبة هيك، عم بلعب أنا” بتقلوا “روح لعاب بالكبة والأربعة”.

٢. مفكر حالك قديس بسكوان

هيدي العبارة تستخدم لما يكون الشخص بدو يهت حدا غلطان وعامل حالو بريق بشي معين فبصير يقلو” شو لتكون مفكر حالك قديس بسكوان”.

٣. هيداك وج الضيف

بتنقال لما حدا يعمل الشغلة مرة وينسحب من دون لا تفسير ولا تبرير ويختفي كلياً، مثلاً: لو وعدك خالك يجي لعندك يزورك كل يوم، إجا مرة وبعدها ما إجا بنوب، بتقلوا شفناك مرة و”هيداك وج الضيف”.

٤. ليك هل جربيع/ جربوع/ جرابيع

بتنقال عن ناس ما بيعرفوا يتصرفوا بالحياة الإجتماعية ومع الناس وبجرصوا حالن عالطالع والنازل “ليك هالجربوع” من وين جايبينوا؟ أو مثلاً لو شفت رفيقك قاعد بحفلة عامل حالو كتير راقي ومهذب، بس من تحت لتحت بيتصرف بطريقة مقرفة، بتقلوا “ليك يا جربوع” حافظك أنا.

^{Credits: A7la Balad Lebnen}

٥. ما بقى تطير فيولة

هيدي العبارة بتنقال لكل حدا بكذب وبفنص، “ليك ملا فيل” يعني ليك ملا كذاب. ولو مثلاً حكالك رفيقك قصص وحكايات عن مغامراتو مع البنات، بتقلو “ما بقى تطير فيولة”، لأنو خلصنا هالتفنيص والقصص الخيالية.

٦. ولاد البكليك

بتتقال عن الناس لي مفكرين حالن شي شغلة وهني مدعيين ومتكبرين على الفاضي، مثلاً: “ليك ولاد البكليلك” ما إجو حتى عزونا بموت الماما.

٧. من تاتر ومن عامر؟

هيدي العبارة تستخدم لما حدا يخبص بالحكي أو بالفعل من دون ما يحسبها صح ويصير يخلط القصص ببعضها. مثلاً لما يجي حدا يفرجيك فرش بيتو الجديد ويكون كلو مش لابق عبغضو، بتقلوا من وين جايب هالعفش كلو “من تاتر ومن عامر؟ “.

٨. تعا هيك جاه أو تعا هيك راح

يعني قرب لعندي شوي، مثلاً إذا شي نهار كنتي عم تحكي مع رفيقتك عالتلفون وشفتيها بالغلط بالشارع، بتقليلها “تعي هيك جاه” شفتك أنا.

٩.كان بان دكان

هيدي العبارة مهضومة كتير، إذا بدكن هيي الترجمة اللبنانية ل”bla bla bla”، لتفهموها أكتر رح نعطيكن متل: إجا ريمون لعنا على الصبحية اليوم وصار يخبرنا خبار وشكال وكيف عايش بالسعودية وكان بان دكان ما كان يسكت ومن شوي تفل.

^{Credits: A7la Balad Lebnen}

شو بتعرفوا غير هالعبارات كمان؟

شوفوا كمان، تعوا نتذكر أشهر مذيعات فقرات الربط على التلفزيون اللبناني.