لقينالكن ٤٥+ مطعم شتوي بالمناطق التلجية بلبنان

كلنا بعد نهار طويل من اللعب بالتلج منحتاج لقمة دافية ودسمة. ولأنو بلش موسم التلج، لقينالكن ٤٥+ مطعم شتوي بالمناطق التلجية بلبنان. رح بتلاقوا بالمقال مطاعم دافية مع قعدة جنب الشاميني، مطاعم عائلية، مطاعم قريبة من مراكز التزلج، وحتى مطاعم بتقدم سناكات.

اللقلوق

1. Azawardi Laklouk

إتغدوا بقلب بيت حجر على دفى الشاميني، أو انبسطوا بترويقة وصبحية لبنانية بنص التلوج. من بعد نهار طويل بالمنطقة، دوقوا عندن أطباق لبنانية سخنة، نبيد محلي، والتحلاية اللي بيعملوها بتشهي.

الرقم: 868 888 76

2. J Carlos

مع قعدة من قزاز وفيو مفتوحة من كل الميلات ع جبال اللقلوق، هالمطعم رح يعجبكن كتير إذ عبالكن تستمتعوا بالمناظر التلجية مع لقمة طيبة. عدا عن انو بيقدم أطيب المأكولات اللبنانية والأطياب الجبلية المميزة، ولتكمل قعدتكن جربوا من عندو طبق اللحمة النية بيعملوا غير شكل.

الرقم: 088 400 71

3. مطعم نقروشي

ممكن أكتر شي ممكن يدفيكن بعد نهار بالتلوج هو الأكل الدسم والمحرز. هالمطعم بيقدملكن جميع السناكات والبرغر والبيتزا، المشاوي من لحمة ودجاج مع المازة اللبنانية والسلطات الشهية، وأكيد ما مننسى كاس العرق.

وفوق الأجواء التراثية، بتلاقوا هيدا مطعم شتوي تحديداً بين جبال اللقلوق البيضا!

الرقم: 733 146 70

4. Laklouk Village Vacances

هالمطرح عبارة عن أوتيل و مطعم شتوي إستثنائي بيعمل بوفيهات نهار الأحد وأكل شتوي بيشهي. فيكن تستمتعوا عندو بليالي دافية مع فوندو ونبيد وستيك وموقدة ع الحطب. 

وفيكن تنبسطوا بلقمة طيبة بين التلوج ومع منظر الجبال، في أحلى من هيك؟ وحتى كأوتيل عندن تجارب رومانسية بين التلوج متل جاكوزي دافي بنص الطبيعة!

الرقم: 112 441 03

5. The Ridge

إستمتعوا بأطيب المازة اللبنانية عند ذا ريدج، مطعم شتوي بأحلى المناطق التلجية بلبنان! 

عدا عن الترويقة الطيبة مع منظر التلوج.

الرقم: 033 430 09

كفردبيان

6. جنينة الخواجة

واحد من أطيب مطاعم كفردبيان اللبنانية. أطباق دافية، مازة سخنة، قعدة جنب الشاميني، ومنظر جبلي خلاب ناطركن عند جنينة الخواجة تحديداً بفقرا!

الرقم: 568 444 76

7. Les Caves Faqra

قعدة كهف جنب الشاميني وعشا رومانسي بين وورود حمر لإلكن وللشريك عند هيدا مطعم شتوي. 

بتجربوا جبنة فوندو دايبة مع أطباق لحمة ونبيد أحمر مع جو كلو دفى وكنكنة هي وعم تتلج الدني برا.

الرقم: 418 894 03

8. Le Montagnou

إنبسطوا بعشا فاخر مع أجواء سويسرية عند مطعم شتوي بنص كفردبيان أحلى المناطق التلجية بلبنان كلو! جبنة فوندو، ستيك، نبيد، وعندن فيو للجبال بكفردبيان بتاخد العقل. 

الرقم: 441 341 03

9. مطعم زنهور 

مطعم بيقدم أكلة برغر محرزة ودسمة، مشاوي لبنانية وسناكات طيبة. محل ضروري تجربوا مع رفقاتكن بالمنطقة!

الرقم: 850 144 70

10. جلسة خوابي

جربوا العرق البلدي مع اللحمة النية والمازة اللبنانية والمشاوي الطيبة مع جاط تبولة غير شكل! مطعم جلسة خوابي غير شكل للعيلة قبل مشوار تلج بكفردبيان.

الرقم: 332 554 03

11. عند شاكر

إستمتعوا بقعدة تراثية ومكنكنة جنب صوبا الحطب عند شاكر! بيعملوا أكل بيتوتي ولقمة مليانة دفى بكفردبيان!

الرقم: 800 341 29 – 046 771 03

الزعرور

12. Roots Eatery

هالمطعم بيقدملكن المناقيش ع الصبح، والسناكات ع الغدا أو العشا. بتلاقوا البيتزا الطيبة، السندويشات المتنوعة، البرغر الدسم، الدجاج المقرمش، وحتى الستيك الشهي.

الرقم: 397 297 81

13. Slice Zaarour

إذا طالعين ع الزعرور وعبالكن بيتزا إيطالية ع الحطب بتدفي البطن، هيك تطلع مقرمشة ورقيقة ومحشية صلصات إيطالية بتاكلوا صبيعكن وراها، لازم تجربوا هيدا المطعم المميز.

الرقم: 966 679 76

14. Zaarour View Restaurant & Bar

لقمة لبنانية أصيلة وجو مليان دفى بنص سقعة الزعرور! هالمطعم بيقدملكن جو حلو للجمعات مع أطباق لبنانية شهية، مازة جبلية، وكاس عرق غير شكل.

الرقم: 528 258 81

15. مطعم قصر البحيرة

مطعم قصر البحيرة بيستقبلكن على قعدة تراثية جنب الشاميني. والحلو انو هالمطعم قاعد جنب البحيرة، فبتقدروا حتى بعزّ الشتوية تستمتعوا بمنظر الجليد والجبال مع لقمة جبلية أصيلة.

الرقم: 779 111 71

16. مطعم زهر الربيع

جربوا اللحمة النية ع أصولها بالزعرور عند هالمطعم اللبناني المميز، قاعد فوق الجبل وبينزلكن سفرة كريمة مع أطباق مغنّجة ع الآخر.

الرقم: 564 444 70

17. مطعم سما زعرور

مطعم سما زعرور اسم ع مسمى مع قعدة بتحسسّكن إنكن فوق الغيوم. بالشتوية، بتقدروا تستمتعوا بمنظر خيالي بالزعرور مع قعدة جنب الشاميني ولقمة مليانة دفى.

الرقم: 063 680 03

18. Ilago Zaarour Club

عبالكن تتزلجوا ومش عارفين وين تاكلوا؟ لازم تجربوا هالمطعم المميز مع قعدة جبلية إستثنائية جنب سفوح الزعرور وتلوج جبالها!

الرقم: 510 310 04 – 000 603 03

أرز بشري

19. مطعم الأرزة

مطعم الأرزة من أشهر مطاعم أرز بشري، بيتميز بقعدة تحت أكبر شجرة أرز معمّرة بالعالم وعمرها 6000 سنة. قعدة تاريخية، جو تراثي، ومطرح مليان دفى بالشتوية.

بتجربوا أطيب كبة جبلية وأطباق بشرانية مع منظر التلوج البيضا.

الرقم: 746 666 03

20. مطعم و كافيه الأرز

عبالكن ترويقة أو غدا بقلب غابات الأرز العظيمة؟ ما إلكن إلا تميلوا على مطعم وكافيه الأرز، مقصد مميز لكل محبي الـ Hiking ورياضة المشي بالطبيعة. 

انبسطوا بترويقة صاج ولبنة وجبنة مع كباية شاي سخنة، أو غدا مشاوي ولحمة نية وكبة شمالية على ريحة شجر الأرز. والمنظر لما تتلج الدني بياخد العقل!

الرقم: 797 448 70

21. سمارولا

إتجهوا عند سمارولا مع أصحابكن وإستمتعوا بمنظر خلاب للوديان والجبال ببشري. 

مطرح بتجربوا فيه حلويات طيبة، شوكولا دافية، قهوة غنية، بتقعدوا بين الألوان الحلوة وبياض التلج، وبتقضوا وقت مميز بالشتوية.

الرقم: 933 923 81

22. مطعم أوتيل الأرز

أكل دافي، جو سويسري، كاس نبيد أو كباية كاكاو سخنة، مع قعدة مكنكنة جنب الشاميني! إتجهوا انتو والحبيب على مطعم Le Pichet بأوتيل الأرز وإستمتعوا بمأكولات عالمية وقعدة ساحرة ببشري.

الحلو انو الأوتيل بيطل على مناظر خيالية للمنطقة وجبال الأرز المباركة، بيعملوا جولات ومشاوير بالطبيعة بتتضمن Hiking و رياضة تزلج ووقت مميز بين التلوج الناصعة. هالمطعم رح ياخكن على سويسرا بكل أجوائه الحلوة والشتوية، ولتعرفوا وين فيه أماكن هيك بلبنان، شوفوا المقال هون.

الرقم: 777 413 70

إهدن

23. مطعم الفردوس

مطعم الفردوس مطعم شمالي على الأصول، بتجربوا الكبة النية والكبة الزغرتاوية والكبة المشوية مع كاس عرق ومنظر التلوج الإهدنية.

الرقم: 701 060 70

24. مطعم بيت ستي

مطعم بيت ستي بيفوت السعادة على قلوبكن من أطباق مشاوي لبنانية، أكلة الكبة بالجرن، ومازة سخنة وباردة بطعم أصيل.

عندو قعدة شتوية مع فيو مفتوحة على جمال الطبيعة الشمالية.

الرقم: 528 428 81

25. مطعم حنين

بتلاقوا الكرم الشمالي والقعدة الإهدنية بمطعم حنين. هالمطعم مميز لمشوار مع العيلة لتجربوا سفرة كريمة ومغنّجة بأطيب الأطباق اللبنانية مع أجواء بيتوتية دافية.

الرقم: 488 778 03

26. مطعم باب الهوى

مطعم باب الهوى رح يخليكن تنغرموا بلقمة إهدن، بيفتح بالويك-اند خلال الشتوية ليقدملكن أطباق لبنانية شهية ومعمولة بكل أصول.

الرقم: 047 456 03

27. مطعم أسمهان

فيكن تجربوا أطيب المأكولات البحرية ومنيو متنوعة من الأطباق العالمية على جو مرتب ودافي بقلب مطعم أسمهان.

الرقم: 900 414 71

28. مطعم تاج إهدن

عيشوا جو إهدن الجبلي مع مناظر التلوج البيضا عند مطعم تاج إهدن. مش بس عندو مناظر خلابة، بس كمان بيقدم أشهى مازة لبنانية بالمنطقة.

الرقم: 069 203 71

29. مطعم وادي إهدن

جربوا قعدة الشاميني مع كاس عرق ولقمة مشاوي ومازة وتبولة عند مطعم وادي إهدن. مطعم تراثي لبناني على الدقة القديمة.

الرقم: 417 417 76

30. مطعم بلاتانوس

مطعم بلاتانوس قاعد بنص شوارع إهدن، بيقدملكن قعدة شاميني دافية ومكنكنة بهالطقس، مع أطباق لبنانية وعالمية متنوعة.

الرقم: 058 117 70 – 678 560 06

الشوف

31. بيت الجبل، دير القمر

عبالكن بيتزا دافية على الحطب وبوفيهات من أكل لبناني بيشهي؟ بيت الجبل مطعم وبيت ضيافة على الدقة اللبنانية القديمة، بيتميز بالقعدة الجبلية والجو الرومانسي اللي بيرجعكن على أيام زمان. لقمتو طيبة، قعدتو فوق الجبل بدير القمر، وبتلاقوا التراث اللبناني بكل تفاصيلو! واحد من أجمل المطاعم الجبلية بالشوف!

الرقم: 767 160 71

32. مطعم المملكة، الباروك

عبالكن غدا بقلب كهف من الحجر القديم؟ مطعم المملكة مطعم جبلي معروف بالقعدة الملوكية والسفرة الكريمة، بيستقبلكن على قعدة دفى بالشوف. من أطيب المطاعم اللي ممكن تجربوها بالمنطقة، خصوصي إذا مشواركن على أرز الباروك!

الرقم: 143 865 03

33. بيت القمر، دير القمر

بيت القمر بيقدملكن أكل بيت وبوفيهات الضيعة على جو أيام الزمن الجميل. رح تسحركن التفاصيل الكلاسيكية، لقمة الضيعة الدافية، أطياب دير القمر، وهيك الجو المكنكن كلو على بعضو. والأكل كلو معمول من ديات شيفات لبنانية من ضيع الشوف!

الرقم: 411 661 03

34. مطعم بيتنا، الباروك

مطعم بيتنا بيستقبلكن على سفرة من الأكل اللبناني الأصيل، المازة الجبلية الطيبة والمميزة، و الجو البيتوتي الحلو للجمعات أو ضهرات العيلة بالشتوية.

الرقم: 456 841 03

35. بكرزاي، بعقلين

القعدة بالجبل والموديل اللبناني القديم بتلاقوا عند بكرزاي، مطعم وفندق بنفس الوقت. استمتعوا مع شريكن بعشا دافي جنب الشاميني أو مع إطلالة حلوة لجبال الشوف. وإذا حبيتوا القعدة والجو، كفوا الليلة عندن ببيوت الضيافة!

الرقم: 664 766 71

36. أوتيل ومطعم دير الأمراء، دير القمر

يمكن ما في أحلى من قصور الشوف التاريخية، ومنها دير الأمراء اللي تحول لأوتيل ومطعم لبناني.

ضيعوا بين القناطر العالية، القعدة الملوكية، الجو اللبناني، والسفرة الكريمة عندن! مطرح عنجد بيحسسّكن إنكن إمراء بالخدمة المميزة والقعدة الجذابة، وكلو على منظر جبلي شوفي بإمتياز.

الرقم: 935 119 71

37. إم بطرس/الفندق، معاصر الشوف

مطعم إم بطرس قاعد بقلب الفندق، واحد من أجمل الأوتيلات بالمنطقة وبيتميز بقعدتو البيتوتية وأجوائه الدافية. 

ع الترويقة بيعملو بوفيه من أكل لبناني، ع الغدا أو العشا بيقدموا منيو موسمية من أطيب المأكولات الجبلية على كاس نبيد أو عرق لبناني. بيتفننوا كتير بالأكل اللبناني، وكل المكونات طازة من الجنينة!

الرقم: 931 300 81

الفالوغة

38. مطعم وأوتيل رامي

مطعم رامي بيستقبلكن على  جو مميز للجمعات متل العيلة أو الأصحاب، عندو منيو مشكلة من أطيب الأطباق اللبنانية والبوفيهات الكريمة. 

هالمطعم عندو قعدة شتوية مليانة دفى مع منظر الصنوبر والطبيعة بالفالوغة. وكمان قاعد بقلب أوتيل مكنكن وحلو للشتوية، بتفيقوا على ترويقة غير شكل مع منظر التلوج.

الرقم: 937 215 03

39. مطعم الوسيم

بتلاقوا بمطعم وسيم المشاوي من اللحمة والدجاج على أصولها، سفرة كريمة وأكل تراثي وقعدة دافية بالشتي.

الرقم: 200 116 71

حراجل

40. جلسة العرزال 

قبل مشوار التلج ع فاريا، ميلوا انتو والعيلة على هالمطعم الدافي لتجربوا ترويقة لبنانية على الأصول الكسروانية.

رح تتونسوا بكباية شاي وقعدة جنب صوبا الحطب!

الرقم: 650 711 03

41. جلسة ليالينا

جلسة ليالينا بيقدملكن عشوات دافية وسفرة لبنانية كريمة. بيقدم الأطباق الشهية والطبخات التقليدية الدسمة، لحمة نية ع الطريقة الجبلية ومازة بيتوتية غير شكل، وبيعمل أطباقو بلحمة غنم مميزة. ومع الأكل الطيب بتلاقوا قعدة موقدة كلها دفى.

الرقم: 471 180 03

42. مطعم فؤاد خليل

هالمطعم المحبوب بمنطقة حراجل بيقدم سفرة لبنانية على أصولها و ع طريقتو الخاصة. الحلو انو عندو قعدة شتوية مكنكنة ولطيفة لهيدا الطقس. بتلاقوا موقعو هون.

الرقم: 639 216 03

43. مطعم نار الموقدة

عبالكن قعدة ع نار الموقدة؟ هالشتوية غير شكل عند هالمطعم المكنكن، عندو قعدة تقليدية وفيو مفتوحة على جمال الطبيعة وأكيد جلسة ع دفى الصوبا.

الرقم: 770 130 03

44. مطعم بيدر جدودنا

حتى لما تتلج الدني، هالمطعم اللبناني فاتح بوابو لتجربوا لقمة حراجل الأصيلة وجو الضيعة المميز.

الرقم: 037 998 03

حمانا

45. تشيري لاين حمانا

هالمطرح بيقدملكن تجربة أكل شتوية بنص بياض التلوج وبين الشوارع الحمانية القديمة.

إذا عم تبرموا ع مطرح ونس بحمانا لتنبسطوا بعشا دافي جنب الشاميني مع الشريك، لازم تجربوا تشيري لاين.

الرقم: 588 335 71

46. Piazza 1140 

بين شوارع حمانا الأيقونية، بتلاقوا جوهرة إيطالية مع قعدة بتطل ع السوق وجو الضيعة.

جربوا عندن أطيب أطباق المطبخ الإيطالي وع الطريقة التقليدية، محضرة مع مكونات شغل بيت وصوص غنية ومخبوزة على الأصول بالفرن ع الحطب، من بيتزا، باستا، وع جنبها سلطات، وغيرها من الأكلات الدافية والشهية.

الرقم: 178 138 79

47. بيت ست الكل

بيت ست الكل فاتح بوابو للكل ليجربوا الأكل اللبناني الطيب من مشاوي، دجاج ع الفحم، طاووق، وسلطات وغيرو، وكمان أكلات عالمية دسمة وشهية من سندويشات وبرغر وبيتزا. 

هالمطعم بيقدملكن جو مهضوم ولطيف، مع فعاليات فنية وموسيقية وحتى بتلاقوا مكتبة. رح بتلاقوا بمكان واحد نشاطات مسلية وأكل طيب.

الرقم: 889 076 81

48. Combos

إذا خاطر عبالكن برغر دسمة ع دجاج أو لحمة مغرقة بالصوص، أو سندويشات وسناكات بتشبع بمشواركن بالضيعة، لازم تجربوا هالمطعم بفرعو المميز بحمانا.

الرقم: 719 151 81

خبرونا، أي مطعم شتوي بقلب المناطق التلجية بلبنان رح بتجربوا هالسنة؟

شوفوا كمان، ١٥ مطعم لتدوقوا فوندو الجبنة الدايبة هالشتوية بلبنان