حلّو قهوتكن الصبح مع “كبسة طربوش” من هالكافيه

بتتذكروا لما كتبنا عن دونات الطربوش و إنغرمنا فيها؟ هلق محبي القهوة بيقدروا يستمتعوا بنسختن الحلوة من هالتحلاية الطيبة مع نكهة الكافيين و تحديداً الاسبريسو، و بالعادة بيطلبوا الأشخاص اللي بيفضلوا قهوتن تكون مرة أو سادة. اليوم رح نخبركن عن تجربة صباحية حلوة، كافيه مون بالجميزة نزلوا ع المنيو “كبسة طربوش”، ومع انو كبرنا وبطلنا زغار بس كتير إنبسطنا لما شفنا هالشي فخلونا نخبركن عنا شوي. 

كيف بتتقدم كبسة طربوش؟ بيفتحوا تحلاية الطربوش من فوق، بيشيلو شوي من الكريمة اللي جوا (مش كلها) وبيسكبو الإسبريسو دغري بقلبو، فبتنجمع طعمة الإسبريسو مع شوكولا الطربوش. فإذا عبالكن تحلّو قهوتكن المرّة شوي، فيكن تجربوا هالطريقة المهضومة اللي فيها شوية حلاوة وقرمشة بسكوتة مع الكريمة ونكهة شوكولا. التجربة أكيد رح تفرفح الطفل اللي جواتكن وترجعكن لأيام الطفولة!

نحنا منعشق القصص الزغيرة اللي بترجعنا على طفولتنا وأيام زمان. وهلق صار فيكن تحسوا بهالشعور الحلو كل يوم الصبح، تطلبوا قهوتكن مع كبسة طربوش من أهضم كافيه بالجميزة! والحلو انو عندو مشروبات وحلويات طيبة ومخبوزات دافية مع جو فني مميز. ولتدوقوا كل شي جديد عند مون، تابعوا حسابن على الإنستغرام هون. ولتعرفوا هني وين بالزبط بالجميزة، شوفوا موقعن هون. 

خبرونا، رح بتجربوا كبسة طربوش ولا لا؟ 

،شوفوا كمان

أطيب ٩ محلات بتقدم كاسة سحلب هالشتوية!

١٧ طبق حلو عربي لازم تجربوا من هالمحلات بلبنان!