٧ سندويشات محرزة تجربوها بلبنان

إذا انتو من محبي السناكات والسندويشات الشهية، لقينالكن ٧ سندويشات محرزة تجربوها بلبنان!

1. سندويشة القريدس من Cloudy Bites

سندويشات Cloudy Bites معروفة انها طرية وغنية، بيقدموه هيدا الصنف ع دجاج ولحمة وقريدس، بس نحنا إخترناكن القريدس: بتجي محشية قريدس مع روكا وبصل وكبيس وصوص حرّة بيعطي نكهة مميزة. والحلو انو البطاطا تشيبس اللي بيعملوها طازة وشغل بيت. 

وين: حارة حريك

الرقم: 899 633 81

2. بريوش اللحم المكرمل من OPALE

خبز البريوش الحلو طيب مع كل شي. جربوها مع لحمة، موزاريلا، بصل مكرمل كبيس، حبش، خس، مايونيز مع الخردل، ومقدمة مع مقبلات من البطاطا الحلوة. كمان عندن تشكيلة من سندويشات البريوش لتختاروا منها، متل سجق لبناني، مع دجاج، وخيارات طيبة كتير.

وين: كسليك

الرقم: 188 484 70

3. سناك الدجاج من Kitchen Garage

هالمطعم بيستاهل كل الضجة اللي عاملها خصوصي انو سندويشاتو طعمها كتير قوي. ونحنا رح نقلكن عن سندويش الدجاج اللي بيعملها، مع دجاج مقلي بصلصة سرية، عليها شيتوس، الباربكيو، الهوني ماسترد، الخس والكبيس – كل هيدا محشي بخبزة sub  طازة.

وين: عاليه

الرقم: 522 412 81

4. ستيك فرايتس من بيسترو باجيت

لمحبي الستيك، شو رأيكن تجربوا طبقكن المفضل بقلب سندويشة؟ هالمكان المميز بمار مخايل بيقدملكن سندويشة ستيك فرايتس بتشهي ودسمة، مغطس بالصوص اللي كلنا بنعرفه وبنحبه. كمان ممكن تطلبوها مع كاس نبيد. 

وين: شارع أرمينيا، مار ميخايل – بيروت

الرقم: 416 476 03

5. صينية السندويشات من فايربيرد

عبالكن تدوقوا دجاج ناشفيل الأصلي؟ مقلي ع المزبوط، بقلب خبز محمص ومغمور بالصوص. والحلو انو بهالمحل انتو بتنقوا أديه بدكن نكهة الحر تكون قوية. بتجربوا صينية السندويشات بتجيكن مع بطاطا Firebird الطيبة، ملفوف، كبيس، وماك أند تشيز أو Firebird pops. 

وين: مار ميخايل، بيروت

الرقم: 870 570 71

6. الستيك بالعسل من جانكيز

خلونا نعرّفكن على سندويشة الستيك بالعسل من Junkies. سندويشة كبيرة، مليان ستيك مع كبيس، البطاطا المقرمشة، الأيسبرغ، البصل، مع الجبنة الأميركية و صوص الخردل بالعسل – وبالآخر بيضيفوا عليها العسل. وحتى فيكن تجربوها بالدجاج!

وين:

حارة حريك، الرقم: 767 555 71

بيروت واي، الرقم: 746 555 71

7. سندويشة الSicilian من Phil & Will

لكل محبي السناكات،  لازم تجربوا عند Phil & Will سندويشة السيسيلي مع صلصة البيستو وتتبيلة غير شكل، وطلبوا معها تشيبس كمقبلات. 

وين:

الجميزة، بيروت – الرقم: 869 185 76

البترون – الرقم: 905 563 70

خبرونا، حبيتوا شو إخترنالكن من سندويشات محرزة؟

شوفوا كمان، ٧ محلات سندويشات طاووق متل “ملك الطاووق” وأطيب