قهوة سادة مع أرشيف جريدة السفير، شوفوا هالكافيه بالحمرا

بتعرفوا غنية خالد الهبر “خدني معك وديني ع شارع الحمرا”؟ اليوم رح نعرفكن على محل رح بيذكركن بهالغنية بالتحديد. مشوا نوديكن على كافيه بيروتي مميز بشارع الحمرا ! اسمو “ملتقي السفير” قاعد بمبنى السفير، بيقدملكن مساحة فنية وملتقى ثقافي وكافيه للعمل بنفس الوقت. 

المكان مستوحى بكل تفاصيلو من ثقافة لبنان وجريدة السفير، رح بتلاقوا حالكن فيه و تتعرفوا ع ناس وجمهور بيشبهكن. 

بيستضيف هالملتقى المحاضرات والندوات والحوارات الثقافية مع شخصيات مثيرة للإهتمام. كمان ورش العمل و التدريب و الإنتاج المتنوعة. بتلاقوا العروض الفنية من رقص ورسم، وعروض سينمائية وأفلام، وحتى أمسيات موسيقية، و الفعاليات المختلفة.

 إذا انتو فنانين أو بتحبوا الفن، رح تنغرموا بهالمحل! لأنو بيقدم مشغل فني ومساحة للإبداع والتعبير، هيدا عدا عن الجو القديم والكلاسيكي الممتاز.

بهالكافيه بتتعرفوا على لمحات تاريخية بتاخدكن على حقبات زمنية مؤثرة من قلب المكتبة، ومنها بتدخلوا على أرشيف جريدة السفير من قلب السفير.

 مع قعدة ع كرسي خشب، و فنجان قهوة سادة، وجريدة السفير بين إيديكن، رح بتتونسوا ع الآخر. جو حلو خصوصي للناس اللي عندها اهتمامات وتطلعات ثقافية. 

ملتقى السفير كمان بيقدم مساحة مناسبة للشغل وقاعة لعقد الاجتماعات، مع خدمات كاملة من قهوة وأكل وإنترنت ل ١٢ ساعة بالنهار.

وين بتلاقوا ملتقى السفير تحديداً: ملتقى جريدة السفير، شارع أمين منيمنة (نزلة السارولا)، الحمرا 

بتحبوا الحمرا وكل شي فيها؟ شوفوا هون: أحلى ٦ كافيهات بشارع الحمرا