٥ كافيهات بيروتية مع منظر ع البحر

عبالكن تغيروا جو؟ زهقتوا من الشتوية وشتقتوا للبحر؟حملوا حالكن وتوجهوا على واحد من هالكافيهات البيروتية مع منظر ع البحر.

١. منارة بلاس كافي Manara Palace Café، المنارة

بحر بيروت وسحرو ناطركن عند كافيه المنارة يلي هوي واحد من أقدم وأشهر الكافيهات بالمنطقة، عندو فيو على البحر بيشرح القلب والروح. غير شفة القهوة، بقدم هالمحل البيروتي المأكولات اللبنانية الشهية والتحلايات يلي بتستحلوها ع الصبح و ع العصرونية.

الرقم: 949 364 01

٢. بتي كافيه Petit Café، الروشة

جار صخرة الروشة وبيعرف كل أسرار بيروت وأخبارها، وبكل زاوية في بتشموا ريحة بيروت وبتسمعوا صوت البحر وموجاتو. بقدم مأكولات لبنانية وأجنبية على أنواعها مع أجمل منظر ممكن تفيقوا علي أو تنهوا نهاركن في. ما في ألذ من فنجان القهوة والتحلاية مع قطعة غاتو على المغيب.

الرقم: 855 878 78

٣. المندلوان Al Mandaloun Waterfront، وسط بيروت

بقدم أشهى الأطباق المحضرة بطريقة مميزة وفخمة من الأطباق البحرية للحلويات وأطباق المازة اللبنانية. فنجان القهوة إلو طعمة تانية لما تكونوا حد البحر عم تحسوا بسلام من ورا سحرو وجمالو وتسرحوا بأفكاركن لبعيد.

الرقم: 404 400 03

٤. يو You، المنارة

هالقهوة ببساطتها قادرة تخليكن تنسوا همومكن للحظة لأن بقولوا كل ما الإنسان يقرب من البحر كل ما همومو تخف وتزغر. كلوا أطيب السندويشات والمأكولات السريعة مع فيو ع البحر وتلذذوا بالقهوة الخاصة بالمحل وبالبوظة المميزة.

الرقم: 992 035 70

٥. الفلمنكي، الروشة

لتعيشوا الحياة البيروتية العتيقة لازم تجوا على هالكافيه، بتشربوا فنجان القهوة إنتو وشايفين صخرة الروشة وبحر بيروت كلو. أكيد لازم تدوقوا ترويقتكن البلدية مع منظر بروق الأعصاب لتكون تجربتكن البيروتية مثالية.

الرقم: 011 808 01

شوفوا كمان، حمام روماني بالجبل: أحلى مغامرة هالشتوية!