١٤ شغلة بتصير معكن بعد ما رفقاتكن المهاجرين يسافروا

كلنا نعجقنا بموسم الأعياد مع رفقتنا المهاجرين واللي قرروا يزورونا هالشهر. كرمال نضحكن معنا، خلونا نشوف ١٤ شغلة بتصير معكن بعد ما رفقاتكن المهاجرين يسافروا. ما تنسوا تبعتوها لرفقاتكن!

1. صار فيكن ترتاحوا على رواق بعد كل السهرات اللي سهرتوها بمار ميخايل

من دون أي مبالغة.

2. أخيراً بطّل النق على ضهرة البترون

الكل بيعرف اديه مشوار البترون بدو تخطيط وطلعات ونزلات وتزبيط مواعيد، وأغلب الأوقات بيفشل.

3. معش رح تسمعوا “أي نحنا عنا بـ كندا/دبي/فرنسا…” لفترة طويلة

يمكن من أسأل الإشيا اللبنانية المهاجرين بيقلوها لما يجو لهون.

4. هني آخدين إجازة من شغلن وإجو ع لبنان، وانتا بعدك علقان بدوام للساعة 5

بيقرروا بشكل عفوي انن بدن يروحوا مشوار بالسيارة الساعة 11 الصبح، وأنت بعدكن بالشغل .

5. قرفت العيد لأنو صرت شايف زينة العيد بوسط بيروت مليون مرة، وهني بينبهروا فيها كل مرة

ما منعرف ليه كل مهاجر لبناني معلّق هلقد بهالزينة لما يرجع وقت الأعياد.

6. وأكيد رحتوا على كل مهرجان وسوق كريسماس ببيروت

وما تنسوا المهرجان بالبترون كمان!

7. “يا الله، كتير اشتقت لبيروت”

بيقلوها للعبارة مليون مرة بالنهار وهلق رح تبطل تسمعها كمان لفترة طويلة.

8. كل ما نقت ع شي بالبلد، كانوا يقلولكن “ليه ما بتقدموا لعنا ع كندا”

الحكي ببلاش.

9. قرفوا الدني انو بلبنان فيك تسبح وتتزلج بنفس النهار

ممكن تطلّع اللبناني من لبنان، بس لبنان رح يضلوا باللبناني

10. زمطوا من تسمم أد ما أكلتوا من أي محل، لأنن ما بيشتاقوا إلا لسندويشة الشاورما من المحل اللي فاتح بنص الشارع

الصحة بتروح وبتجي بس الرفقة بيضلوا (هيدي كذبة ع فكرة)

11. وإرتحتوا من الفزلكة لما تعلقوا بعجقة سير

إي، قال هني عندن بألمانيا ما في عجقة سير

12. نزلوا Story مرتين عالأقل مع منظر لبيروت وغنية لفيروز

منعرف الشعور للصراحة.

13.كلمة وحدة: فاريا

شو الفرق بين التلج بكفردبيان والتلج بسويسرا؟

14. رح يضلن ينزلوا عن ضهراتن بلبنان لأشهر لقدام

ما فيهن يتخطوا.

مصدر الصورة الرئيسية: Pinterest.

شوفوا كمان، زبطوا أحلى ضهرة مع رفقاتكن المغتربين على تطبيق وينك!