بتعرفوا في متحف أرمني بلبنان؟ رحلة على متحف بيت كيليكيا

بتعرفوا إنو في متحف أرمني بلبنان؟ اليوم رح ناخدكن رحلة من أرمينيا على لبنان من قلب متحف بيت كيليكيا بأنطلياس. هالمتحف إحتضن الجذور الأرمنية وحافظ على تاريخها وكان شاهد حيّ على مسيرة الشعب الأرمني والنضال التاريخي رغم المآسي والمعاناة العظيمة. مشوا معنا نتعرف على هالمتحف، شو بيضم من حضارة وتاريخ غني لواحد من أجمل شعوب العالم.

المتحف مدخل على الذاكرة الجماعية الأرمنية

متحف بيت كيليكيا أو بيت كيليكيا بمثل تراث غني إمتد على 1700 سنة من أرمينيا وصولا على لبنان اليوم، وضل متمسك بجذورو وأصولو. وكان المتحف واحد من المقرات الأساسية للأرمن بلبنان بعد التهجير من مدينة سيس والأحداث القاسية متل المذابح والمجازر ب 1915. تم إفتتاح المتحف بال 1998، وهو داخل مبنى الإكليريكية وبيعبر عن الهوية الثقافية والحضارية والروحية لأرمن لبنان.

شو بيضم متحف بيت كيليكيا؟

المتحف بيضم قطع أثرية تاريخية تم إنقاذها من مدينة سيس سنة 1915 ونقلها من حلب ومن بعدا على أنطلياس. وتم حفظها وعرضها بهالمتحف. 

في كذا طابق وصالات فيها كنوز من الحضارة الأرمنية! ذخائر مقدّسة ونادرة للقديسين بتعبر عن الإبداع الأرمني وصلابة روحانية الشعب، تحف ومصابيح ومجوهرات تم تهريبها بال 1915 اللي بتمثل فنّ الصياغة والحرفية الأرمنية، وحتى مطرزات وسجاد وأثاث تاريخي. وكل قطعة بتحاكي هالفترة الزمنية وبتروي قصة شعب مناضل ومقاوم. 

وبتلاقوا كتير كنوز مرتبطة بالكنيسة الأرمنية متل نسخة إنجيل “بارتزربرت”، قطعة من صليب سيدنا يسوع المسيح، التوب أو اللباس الكنسي الأرمني من المخمل، عصي كهنوتية وأسقفية، وغيرها. 

وكمان بتلاقوا لوحات فنية ومخطوطات نادرة من سيس بتعبر عن فنّ الكتابة الأرمينية، وحتى المؤلفات والكتب الأرمينية المطبوعة من سنة 1500 واللي جسّدت حركة الطباعة بهداك الزمن. 

تاريخ ومسيرة نضال الأرمن مفتوحة للكل:

المتحف مفتوح للزوار كل أيام الأسبوع ما عدا نهار التنين، من ال 10 الصبح حتى 5 بعد الضهر، وللساعة 1 الضهر بس نهار الأحد، وهيدا الدوام بالشتوية. فيكن تحجزوا زيارتكن على الرقم: 001 410 04.

شوفوا كمان، متحف ال١٠٠ بيت بالبترون، شو قصة متحف هنري لوسيان؟