٧ كافيهات مكنكنة ودافية ببيروت

بيروت مدينة التناقض والجمال، التاريخ والتراث، الرومانسية والحب، والقصص الكتير حلوة. عندها هالمدينة جمالها الفريد بالشتوية، بتشهدو عليه من قلب مطارحها المكنكنة والقديمة. ولأنو هالطقس بدو شوية دفى، خلونا ناخدكن على 7 كافيهات مكنكنة ودافية ببيروت. 

1. Kalei، راس بيروت و مار ميخايل

عيشوا نوستالجيا بيروت مع ريحة القهوة والقعدة المكنكنة عند هالكافيه. عندن فرع براس بيروت بقلب بيت بيروتي قديم، وفرع تاني بمار ميخايل مع قعدة جنينة. مش بس بيقدموا قهوة مختصة طيبة، بس كمان مخبوزات دافية وكيك شهية حتى تجربوها مع مشروبكن الساخن خصوصي بهالطقس. 

الرقم: 342 780 03

2. بيت كافيه، مار ميخايل

شوارع بيروت لما تشتي الدني عندها سحرها الخاص، وبتلاقوا عند هالكافيه اللطيف أدفى قعدة جنب الصوبا. 

مطرح بيحسسكن كأنكن بالبيت بقعداتو المكنكنة وديكورو البيروتي وجنينو السرية. عندو قهوة وحلويات طيبة، وحتى قعدة بلكون رومانسية بتطل على العمارة الحلوة بمار ميخايل. 

3. كافيه يونس، فروع كافة

كافيه يونس محبوب لقهوتو الطيبة وقعدتو القديمة وأجوائه المكنكنة. أول ما تشتي الدني، ميلوا على أي فرع كافيه يونس ببيروت، دوقوا القهوة المختصة، وروقوا راسكن بجو لطيف وخرج قعدة بالشتوية. 

الرقم: 654 741 01 

4. زمرد، فرن الشباك

هالكافيه الملون من أكتر الكافيهات المكنكنة بالعاصمة، عدا عن قعدتو الدافية بتلاقوا سهريات زجل وعود بجو لزيز وطاقة حلوة. وأكيد ما فينا ما نخبركن عن لقمتو اللبنانية أديه طيبة وبيتوتية. 

الرقم: 206 611 01

5. رصيف بيروت، الحمرا

كافيه بيروتي دقة قديمة بيرجعكن على شارع الحمرا من زمان. من أجوائو المكنكنة وكراسيه الخشب ولقمتو البيتوتية رح تحسوا من قلبكن أديه بيروت حلوة، خصوصي مع فنجان قهوة و صوت طرطقة الشتي بالشوارع القديمة. 

الرقم: 081 340 01

6. La Menagerie، الأشرفية

ما في أدفى من الجو الكلاسيكي القديم، وبتلاقوا هالقعدة الحلوة عند هالمطرح المميز بشوارع الأشرفية. بتقعدوا على ريحة الورود وبتدوقوا أطباق دافية إستثنائية، والأجمل من هيك يعتبر مكان مميز لموعد غرامي هادي وخاص.

الرقم: 206 201 01

7. مكان، مار ميخايل

كافيه ومطعم بيتوتي على الآخر، بتحسوا بالدفى مجرد ما تفوتوا على هالمحل. هالكافيه جوهرة مخباية بمار ميخايل، بيقدموا أكل طيب وقعدة كلاسيكية جنب البيانو واللوحات الفنية. 

الرقم: 057 954 70

خبرونا بالتعليقات، شو بعد بتعرفوا وبتحبوا كافيهات مكنكنة بقلب بيروت؟

شوفوا كمان، ١٦ مطعم شتوي لعشا رومانسي بالجبل