٤ بيوت ضيافة وأوتيلات بتاخد العقل بدوما!

يلي زاير دوما بيعرف إنها وحدة من أجمل الضيع السياحية بلبنان! وما في أحلى من إنو الواحد يقعد كم ليلة بهالضيعة بقلب الجبل ويوعى بكير عهالمنظر الحلو يلي بخليكن تحسوا إنكن بشي ضيعة بسويسرا، لهيك اليوم رح نعرفكن على أجمل بيوت الضيافة والأوتيلات بدوما.

١. ديوان البيك

بيت حجر مخبى بالجبل ومزين بالصور لي رح تذكركن بالزمن الجميل، القعدة كتير جبلية ودافية رح تاخدكن على ريف سويسرا. القعدة بقلب البيت ولا في شي ممكن يكون بريح النفسية أكتر منها، كل تفاصيل هالبيت رح تذكركن ببيوت الضيعة القديمة من الكراسي الخشب للسطيحة العتيقة، أما النومة فتراثية وبتريح النفسية عالآخر.

الرقم: 375 599 76

٢. بيت دوما

بيت حجر تراثي مع قرميد أحمر، بهيدا البيت عدة أوض، كلن شرحين وحلوين وتراس مهضوم بإنتظركن مع مرجوحة وقعدة كراسي وصوفات مريحين حتى تنسوا كل هموم العالم. وأكيد مطبخ، وأوضة سفرة، صالون وأوض نوم لتعيشوا ليلة ما بتنتسى. إذا إنتو بتحبوا بيت القرميد وقعدة الحجر العتيقة وعيشة الضيعة، رح تنغرموا بهالبيت لي بيربط التراث والرواق والذوق الحلو بقلب بيت جبلي ساحر.

الرقم: 702 520 06

٣. ماي ستون سيلر

قصر من القرن ال ١٩ رح يرجعكن بالزمن ويعيشكن تجربة الملوكة! البيت بيبعد بس دقايق عن السوق العتيق وبطل عالضيعة والبيوت العتيقة، لتوعوا الصبح وتشربوا فنجان القهوة عرواق إنتو وعم تستمتعوا بالمنظر. ما في أجمل من القعدة بأوضة حجر تراثية مع عقد حجر من أجمل ما يكون، أما برا فبتلاقوا تراس مهضوم وقعدة جبلية بتستحلوا الترويقة فيها. هلق بالشتوية، الفترة المناسبة لتزوروا هالمكان إنتو وأصحابكن وتقضوا يومين حلوين بعد أسبوع طويل ومتعب من الشغل.

الرقم: 485 283 71

٤. أوتيل دوما

أوتيل مدور مخبى بقلب الضيعة وبيشبه قصر الأحلام، رح يخليكن تحسوا حالكن قاعدين بشي برج قديم، محاوط بشجر الصنوبر وبيتميز بإطلالة ساحرة. الأوض بقلبو مميزة وبطل على أجمل منظر ممكن تفيقوا علي، تخايلوا عم تناموا في والدفا غامركن، ومنظر غرفتكن بتطل على الوادي والجمال حواليكن.

الرقم: 202 520 06

شوفوا كمان، ٧ بيوت ضيافة بتاخد العقل ببيت الدين ودير القمر.