أهضم فيديو، ديو غنائي بين شاب لبناني و بلبل! 

صدقوا لما نقلكن انو الشي اللي رح تقروا مش فيلم ديزني، هيدا حقيقة! الفنان اللبناني غراي بيردGrayy Bird شارك فيديو لطيف على تيك توك عم يغني أغنية ‘Let Her Go’ الأجنبية للفنان Passenger، وهون بيقرر بلبل مهضوم ينضم ويغني معو.

بيظهر بالفيديو البلبل واقف على كتف المغني وعم يصوفر على نغمة صوتو وألحان الغنية، وهالشي أخدها البلبل عادة بكل فيديو، وعملو ثنائي غنائي كتير مهضوم!

ولما سألنا الفنان عن البلبل، خبرنا انو اسمو كوكو، وكوكو بيغني حتى الأغاني الحزينة بكل زعل!

الفيديوهات انتشرت بشكل كبير على السوشيال ميديا، لدرجة حقق واحد منن حوالي 8 ملايين مشاهدة. و هيدا الديو، اللي بعض المتابعين شبهوا بأميرة سنو وايت الحقيقية، كسح TikTok وكتار من المعجبين تركوا طلبات وإقتراحات أغاني جديدة بالتعليقات.

Watch on TikTok

ما منقدر نتخطى أديه مهضومة هالفيديوهات، بتجمع صوت غراي بيرد الحلو مع أهضم بلبل بلبنان! خبرونا بالتعليقات، شو بتحبوا يغني كوكو هالمرة؟

ما تنسوا تابعوهن على تيك توك لتحضروا كل فيديوهاتن أول بأول!

شوفوا كمان، من أرشيف الزمن الجميل، ١٩ صورة نادرة للست ماجدة الرومي!