قعدة وزينة: ٨ كافيهات بأجواء عيد كريسماس!

بمناسبة كريسماس حابين ناخدكن جولة على ٨ كافيهات مميزين مع زينة العيد لي بتفرح القلب! ولأن فنجان القهوة بيكمل مع منظر حلو وزينة العيد رح نخبركن عن ٨ كافيهات فيكن تستمتعوا فيهن بقعدة حلوة مع زينة العيد.

١. شوكو كريب

هالمحل لبس زينة الميلاد المميزة من أضوية وورد أحمر، وبتكمل القعدة مع الشوكولا على أنواعو بالكريب والعصير وبالميلك شايك، بتقعدوا على رواق بدردشوا وبتحسوا بجو العيد مع الموسيقى والزينة.

الفروع: جب جنين، الفرزل، الحمرا، بعلبك، شتورا
الرقم: 997 959 81

٢. كافي يونيكورن Unicorn Coffee House، برمانا

ما فينا نحكي عن الكافيهات المهضومة بعيد الميلاد من دون ذكر Unicorn Coffee House، بيتخصص هالمقهى الاستثنائي بتقديم الشوكولا الشو والقهوة والحلويات وبيشتهر بتصميم الميلادي الساحر والديكور المبهر. حتى إنو عندن صوفا لكل مين عبالو يرخيها ويسرد شوي!

الرقم: 966 822 71

٣. رايز Ray’s، البترون

معقول يكون في أحلا من إنو تقضوا كريسماس على البحر؟ شعور غريب ومميز رح تحسوا بس تكونوا بقلب كافيه محاوطين بالزينة الميلادية والبحر دغري حدكن. بتشربوا أطيب فنجان قهوة مع الزينة الحلوة وببتفرجوا على البحر تحتكن والموج عم بروح ويجي وضروري تجربوا الأكلات البيتوتية عندن وهيك كل شي بالمحل بريح النفسية وخرج صور.

الرقم: 492 181 70

٤. قهوة المندلون

لبست قهوة المندلون حلة الميلاد وجاهزة تستقبلكن، بقدملكن الكافيه قصص مهضومة وخفيفة، ترويقة متل المناقيش مع فنجان قهوة، أو ترويقة سندويش مع صحن فواكي. بتلاقوا عندو كمان غدا خفيف من البرغر أو البيتزا، أو المأكولات البحرية والطبخات وغيرها من الأمور اللذيذة. وفوق إنو لقمتو طيبة كمان القعدة كتير ميلادية ومميزة.

ضبيه: 411 545 04
الأشرفية: 600 321 01

٥. ليف Leaf، البترون

هالقهوة المميزة قاعدة بسوق البترون العتيق ومزينة بزينة العيد الملونة مع الأضوية لي رح تخلي جلستكن حميمية ولذيذة. بالنسبة للأكل، بتلاقوا عندن قسم مالح وقسم حلو يعني سلطات وساندويشات جبنة وجامبون بخبز غير شكل، وقصص تانية معمولة بأشهى أنواع الخبز وكمان عندن كتير اختراعات بالقهوة سخنة وباردة.

الرقم: 220 229 71

٦. ورد كافيه تروتوار Ward Café Trottoir، حدث الجبة

هالكافيه المهضوم رح يرجعكن لإيام الزمن الجميل، أول ما تفوتوا رح تحسوا حالكن ببيت ستكن من ورا الديكور الأنتيكا والدفا والحنية، زينة الميلاد عندن متل زينة البيت بسيطة وقريبة على القلب. بتاكلوا أطيب ترويقة بلدية، وحتى فيكن تجوا على الغدا أو العشا وتستمتعوا بالأكلات البيتوتية.

الرقم: 652 621 03

٧. قهوة زيتونة

الجلسة بهيدا الكافي كتير مهضومة ومميزة، كراسي من لون الأبيض مع زينة الميلاد وين ما كان وكيف ما تبرموا، محاوطين بألوان وتفاصيل العيد. صور الزمن الجميل معلقين على حيطان الصخر، وعندن قعدة حجر بالبترون وطلة على البحر ببيروت مع جو البحر لي بيرد الروح.

الزيتونة باي: 356 370 01
البترون: 877 844 81

٨. منارة بلاس كافي Manara Palace Café، المنارة

كافي المنارة من أقدم الكافيهات ببيروت عندو فيو على البحر بيشرح القلب والروح، منو فيكن تتفرجوا على البحر ومش بس هيك، القهوة كلا لبست حلة كريسماس والزينة كتير مهضومة وملونة ومزينة بالأعشاب والورود الحمر وشجر العيد… رح بتحسوا بجو العيد على الآخر. بتطلبوا فنجان قهوة مع تحلاية زغتورة وهيك بتبلشوا نهاركن صح، وإذا كان الطقس مقبول ومشمس بتقعدوا حد البحر دغري مع الزينة الملونة.

الرقم: 949 364 01

شوفوا كمان، هيك أسعار شوكولا العيد عند أشهر المحلات بلبنان!