٢٣ بيت خشب لازم تزوروهن هالشتوية بلبنان

رح نعرفكن اليوم على أجمل بيوت خشب لقعدة مكنكنة هالشتوية!

١. ذا ببفيو The Bevview، بسكنتا

هالبيت قاعد بالجبل وبطل على أجمل منظر ممكن تفيقوا علي. بتناموا مدفايين منيح وبتفيقوا بتعملوا صبحية بالجبل مع فيو بطير العقل وحتى منظر المغيب رح يريحكن وخرج سردة على فنجان قهوة والتمشاية الصبح حد هل كابين بتروق الأعصاب.

الرقم: 976 623 03

٢. وودهيلز Woodhills، ميروبا

القعدة بهيك محل بس يكون الطقس برد بترد الروح لأن بتشوفوا الشتي من برا وبتحسوا بالدفا والكنكنة وإنتو جوا. ما في أجمل من قعدة حد النار وفنجان هوت تشوكولات مع شرشف زغير وشموع وموسيقى رومانسية. وفيكن كمان تستفيدوا من الجاكوزي وترخوها على الآخر، حتى الترويقة الصبح مع هوايات الجبل ودفا الشمس بترد الروح.

الرقم: 786 177 76

٣. آون Aeon، أغبه

عبارة عن مخبى بمنطقة أغبه بكسروان، هل ضيعة الجبلية عندها جو نقي ومناظر بتاخد العقل. القعدة كتير مريحة وبتكشف على مناظر من الحلم وأجمل شي فنجان القهوة مع منظر المغيب من هالمحل والنومة الدافية لي بعيدة عن العالم.

الرقم: 104 716 81

٤. كاسا دي لا روزا Casa de la Rosa، إهدن

حدا بقلقن قعدة بكوخ خشب حد الصوبيا مع منظر طبيعي ساحر وشبابيك ازاز وأكل طيب؟ برات الكوخ في قعدة لذيذة رح تنسيكن كل مشاكلكن، بمناسبة الأعياد، الكابين تزين ولبس حلتو الميلادية وتزين بالورود الحمر.

الرقم: 123 734 70

٥. أرز إهمج، إهمج

قعدة مكنكنة مثالية لهالطقس البارد، وأكيد رح تحبوا الهدوء والسكينة. قعدوا حد النار غمروا التكايات، اسمعوا فيروز وتفرجوا على الشتي. معقول في أجمل من هيك شعور؟ حوالي الكوخ كمان في قعدة حلوة إذا كنتوا مش كتير مسقعين. وأكيد الكوخ بكون دافي على الآخر لتحسوا بالإسترخاء بس تناموا وتنسوا هموم الدني.

الرقم: 111 487 70

٦. سويتزوري Swizore، كفتون

مشروع مميز عبارة عن بيوت خشب قاعدين بالشمال. موقع هاي الأكواخ غير شكل، موجودين بقلب الغابة بين الطبيعة والخضار والرواق وبطلوا على أجمل المناظر. بتناموا حد النار وبتفيقوا على صوت الطبيعة وبتعملوا ترويقة خفيفة وبتقعدوا على التراس وبتشموا هوا نضيف.

الرقم: 186 548 81

٧. باين فيل Pineville، برمانا

فيلا خشب مميزة رح تخليكن تعيشوا تجربة سويسرا بقلب لبنان، بتطل على غابات الصنوبر والتخت دغري حدو شباك مأزز بيكشف على أجمل منظر ممكن تفيقوا علي. بالسهرة بتولعوا نار والصبح بتفيقوا على صوت العصافير والشجر وفنجان القهوة بهيك قعدة عنجد برد الروح.

الرقم: 736 363 71

٨. أرصون فيلادج Arsoun Village

هالمحل الساحر قاعد بقلب غابة صنوبر بتاخد العقل، بتحجزوا بانغالو وبتناموا بالطبيعة وإذا عبالكن تعملوا بيكنيك ما إلكن غير تجيبوا معكن غراضكن، برا في طاولات وكراسي لتقعدوا على رواق وتستمتعوا بالمنظر الحلو والأكل الطيب وتتنشقوا الهوا النقي. في كمان مطعم لإذا عزتوا شي.

الرقم: 111 228 71

٩. ترينيتي Trinity، فاريا

مشوار على فاريا بالطقس البارد برد الروح وخصوصي إذا طالعين مع غروب أصحاب تناموا بكوخ خشب مكنكن. جوا بهالكوخ المأزز تجربة عنجد خيالية، بتشوفوا التلج مغطي الأراضي والشجر وبتحضروا الشتا إنتو ومكنكنين على الآخر.

الرقم: 888 183 70

١٠. لو ماسيف دو لقلولق Le Massif de Laqlouq، اللقلوق

جوهرة مخفية بلبنان، أوتيل رح ياخدكن على عالم تاني مليان دفا وجو كنكنة. كل الكواخ مجهزين بكل شي ممكن تعوزوا وأول ما توصلوا رح تحسوا حالكن بعاد عن الناس وعن الهموم. بس تتلج الدني بتصير الدني كلا بيضا حواليكن وهيك فيكن تلعبوا بالتلجات أو تقرروا تطلعوا على البيست.

الرقم: 763 476 70

١١. نومادز Nomads, Nature and Nurture، سرجبال

بيوت خشب مميزة قاعدة بقلب الطبيعة وعم بتقدملكن تجربة مميزة وجو دافي مع منظر طبيعي بياخد العقل وأكل مميز.

الرقم: 709 370 76

١٢. ليالي الشمس، عنجر

هالمحل عبارة عن مجموعة كواخ خشبية وأوتيل ومطعم مميز بقدم أشهى الأطباق اللبنانية والعالمية. القعدة بقلب البانغالو مميزة مع نار وكل وسايل الراحة والتسلية.

الرقم: 600 622 76

١٣. واستوود فالي Westwood Valley، زحلة

بيت خشب مكنكن ودافي قاعد بالطبيعة وعندو قعدة رومانسية خرج عشاق أو حتى أصحاب عم بفتشوا عن محل بعيد عن العالم ومجهز بكل وسايل الراحة لتدللوا حالكن.

الرقم: 112 102 81

١٤. برتش Perch، فاريا

عبارة عن بيوت خشب بالجبل بنص الطبيعة مع منظر طبيعي ساحر مكشوف على مساحات خضرا على مد عينكن والنظر وشوفوا .كيف بتصير بيضا وقت التلجات. مجهزين بكل وسايل الراحة والتدفاية لتريحوا راسكن

الرقم: 266 552 03

١٥. تشيل هيل The Chill Hill Experience، وطى الجوز

قرب موسم العطل وما في أحلى من المشوار على الجبل لنعيش الشتوية شوي بمحل مكنكن ودافي. عبارة عن بيوت خشب مجهزين بكل بالصيف وبالشتي رح يخلوكن تعيشوا الراحة النفسية والجسدية لي عم تنبشوا عليها بعيد عن الضجة وعن العالم.

الرقم: 458 775 76

١٦. ذا كايف ريزورت The Cave Resort، القموعة

عبارة عن بيوت خشب قاعدين بقلب الطبيعة وبعيد عن كل شي في هموم وعجقة، ترويقة مميزة مع منظر ساحر ناطركن على الصبح. أما النومة، دافية ورومانسية بتحسوا حالكن سافرتوا لبعيد.

الرقم: 103 411 70

١٧. لورس L’ours، فاريا

عبارة عن بيوت خشب مميزين مجهزين بكل شي وقراب على كل المطاعم والكافيهات بالمنطقة. قضوا ليلة مميزة ببيوتن الخشبية الدافية ونسوا همومكن.

الرقم: 474 727 81

١٨. أوزيت كابين Uzit Cabin، إهدن

بيت خشب زغتور ومكنكن مألف من طابقين وجاهز ياخدكن رحلة رومانسية هالشتوية. عيشوا جو الأعياد ودفوا قلبكن حد النار وبتفيقوا على صوت المطر وبتتفرجوا على منظر بطير العقل وخرج سردة على فنجان قهوة الصبح.

الرقم: 564 214 81

١٩. كوبولا Cupola، سرجبال

بيت خشب مخبى بالطبيعة وبطل دغري على الوادي. بتفيقوا الصبح على صوت الطبيعة وبتعملوا ترويقة خفيفة وبتقعدوا على التراس وبتشموا هوا نضيف وبتشربوا قهوة وبترخوها. بالليل بتناموا نومة الهنا ع تخت كتير مريح مدفايين ومرتاحين.

الرقم: 109 109 71

٢٠. أزوردي، اللقلوق

عبارة عن مشروع مميز بيتألف من بيوت خشب مكنكنة ومطعم مميز وقعدة ومنظر شي بياخد العقل. أجمل شي بس تتلج وتصير الدني كلا بيضا وتحسوا حالكن مدفايين وعم تاكلوا أطيب أكل وتتفرجوا على الشتا.

الرقم: 868 888 76

٢١. حيرونا، أيطو

عبارة عن بيوت خشب قاعدين بالطبيعة وبتلاقوا فيهن الراحة لي عم تنبشوا عليها، قعدة صوبيا وتخت مريح ومنظر مميز.

الرقم: 757 283 81

٢٢. شاتو سكاف، فيطرون

بيت خشب موجود بمنطقة فيطرون بجرود كسروان كلو أجواء دافية وحميمة من الموقد بتكملها قعدة الجاكوزي اللذيذة. البيت بيبعد بس ربع ساعة عن الساحل وبطل على الجبال الخضرا، لتوعوا الصبح وتشربوا فنجان القهوة عرواق إنتو وعم تستمتعوا بالمنظر.

الرقم: 012 707 70

٢٣. سيدار سينت Cedar Scent، نيحا البترون

عبارة عن بيت خشب مخبى عن العالم كلا بيشبه البيوت لي بتشوفوها بالأفلام، كل شي في رح يخليكن تشعروا بالراحة من النومة للقعدة لأجهزة الراحة والدفا، كل شي رح يسحركن.

الرقم: 511 233 70

شوفوا كمان، ٣ مطاعم رومانسية بلبنان أكيد مش سامعين عنها!