٧ من أروع مطاعم حريصا بمناظر خلابة

من دون شك حريصا مقصد سياحي أساسي بلبنان، كتار بيزوروا المنطقة كرمال مزار سيدة لبنان، يطلعوا بالتلفريك، و ينبسطوا بالمطل الخيالي فوق ساحل جونية. ولأهميتها وجمالها للمنطقة، قررنا ناخدكن على 7 من أفضل مطاعم حريصا بمناظر خلابة. 

1. إذا عبالكن ترويقة لبنانية من فوق الجبل، جربوا مطعم مناظر 

مطعم مناظر عبارة عن مطعم لبناني بيطل على خليج جونيه، بتجربوا عندو صاج طيب مع ترويقة لبنة وجبنة وخضرة وزيتون مع كباية شاي سخنة. كمان بتجربوا عندو بهالوقت من السنة هوت شكولات غير شكل جنب الصوبا الحطب. 

الرقم: 960 721 03

2. إذا عبالكن غدا لبناني طيب مع منظر خلاب لساحل جونية، جربوا مطعم بينكي حريصا 

إستمتعوا بمازة لبنانية شهية ومتنوعة مع منظر بياخد العقل للبحر عند مطعم بينكي! عندن منظر لغروب الشمس أبداً ما بيتفوت، وقعدة شتوية جنب الحطب مليانة دفى وكنكنة. والحلو إنو كمان بتلاقوا ألعاب للولاد! 

الرقم: 839 397 03

3. إذا عبالكن مطعم مناسب للعيلة والولاد، جربوا Teleferique Food Court 

هالمطرح مميز لتجربوا لقمة طيبة مع ولادكن وتنبسطوا بنهار من التسلية. عندن ملعب للولاد، وطلعة لزيزة بالتلفريك!

الرقم: 567 350 03

4. إذا عبالكن مطعم بجو تراثي مميز، جربوا مطعم حريصا بارك 

مطعم حريصا بارك بيقدملكن السفرة اللبنانية الأصيلة على قعدة حجر قديمة وجو تراثي غير شكل! مطرح مليان كنكنة ودفى خصوصي بالشتوية! 

الرقم: 971 011 70

5. إذا عبالكن أكل مميز مع جو مرتب ومنظر من فوق، جربوا مطعم قمر 

مطعم قمر بيستقبلكن على قعدة مرتبة ومميزة، وبيقدم أكل بيشهي بكل إحترافية وفن. بتجربوا سفرة مشاوي مليانة مازة وعلى نبيد لبناني مع منظر بحسسّكن كأنكن معلقين بالسما. 

وكمان قعدتن الداخلية ما بتغني عن المنظر الخلاب!  

الرقم: 880 801 03

6. إذا عبالكن تدوقوا أكل إيطالي، جربوا مطعم بحر الهوا 

دوقوا أطيب أكل إيطالي بحريصا عند هالمطعم المكنكن. بتلاقوا الباستا على أنواعها، السباغيتي، تشيكن ألفريدو، لينغويني، أرابياتا، وكمان بيتزا إيطالية على الحطب.

الرقم: 798 644 70

7. إذا عبالكن عشا رومانسي مع الشريك مع فيو خيالية، جربوا مطعم Chapo Ba 

هالمطعم بيتميز بواحد من أجمل المناظر الليلية، بتتفرجوا على ساحل جونية وبيروت من بعيد مع الأضوية الساحرة. 

عندو قعدة مليانة رومانسية وكنكنة، ورد ونبيد وأكل طيب وغني ومنظر خيالي. 

الرقم: 400 934 70 

خبرونا، حبيتوا المشوار على مطاعم حريصا؟ 

شوفوا كمان، مشوار روعة على غوسطا: ٨ شغلات فيكن تعملوها