إدراج المنقوشة اللبنانية على لائحة اليونسكو للتراث الثقافي غير المادي

اليوم نحن مبسوطين نخبركن انو المنقوشة حازت على لقب “رمز المطبخ اللبناني” وتم الاعتراف فيها كحجر الأساس بتراث أكلنا اللبناني.

لائحة اليونسكو للتراث الثقافي غير المادي بتمثل مجموعة من “تعابير شفوية و لامادية متنوعة للبشرية حول العالم”. اللائحة بتسلط الضو على عناصر تراثية بتسعى اليونسكو للحفاظ عليها. بكل بساطة، عبارة عن كتالوغ تقاليد ثقافية من الأساسي حمايتها، لضمان انو تبقى للأجيال الجايي بسبب غناها الثقافي وأهميتها الإجتماعية.

هالمرة، تم إدراج المنقوشة المحبوبة على اللائحة ووصفوها بعبارة “الترويقة اللبنانية المثالية”. وكل لبناني بيعرف إن المنقوشة هي أكبر من انو تكون بس ترويقة! المنقوشة بتصبّحنا على ريحة تراثنا، بتجمعنا على صبحيات الأفران القديمة، هي رابط بيجمعنا كلنا اللبنانية ببعض. إعتراف اليونسكو مش بس تكريم للتراث، بس كمان بيحافظ على تقاليدنا وعلى سيمفونية العجن والخبز و المشاركة اللي جمعت العيل و المجتمع على مر الأجيال.

القائمة بتشرح كمان عن أهمية المنقوشة بثقافتنا و رمزيتها: “ريحة المنقوشة عامل أساسي بيذكّر بالجمعات الصباحية التقليدية، أو ما يعرف ب “الصبحيات”، لحظات أساسية لتواصل إجتماعي. وتحضير المنقوشة بالأفران الزغيرة بيساهم بتطوير الاقتصاد المحلي.”

إدراجها على اللائحة مش بس إعتراف بأهميتها، بس كمان طريقة لنحتفل بعاداتنا و تقاليدنا المرتبطة فيها. هالاعتراف بيرفع من قيمة المنقوشة نفسها، وكمان من الحرفية والمهارات والتقاليد يلي متجذرة بتحضيرها – شهادة حقيقية على تميّز المطبخ اللبناني!

من التقاليد و العادات العربية اللي إندرجت كمان بهيدي اللائحة هالسنة بتتضمن الدبكة الفلسطينية، وحرفة النفخ بالقزاز السورية، وطبق الهريس من السعودية و الإمارات العربية المتحدة وعمان. لتشوفوا اللائحة كاملة، اضغطوا هون.

مبروك للبنان وللتراث اللبناني!