٣ مطاعم رومانسية بلبنان أكيد مش سامعين عنها!

بلبنان كيف ما بتمشوا وكيف ما بتبرموا بيطلع قبالكن مطعم رومانسي، وبتحسوا عبالكن تروحوا علي مع الحبيب أو الشخص الأغلى على قلبكن لتدوقوا أطيب الأطباق وتعيشوا تجربة رومانسية حقيقية، بس اليوم اخترنالكن٣ مطاعم رومانسية لطيفة خرج مواعدة أكيد مش سامعين عنها لازم تجربوها لأول مرة مع حبيبكن بلبنان، غير عن المطاعم الكلاسيكية لي معودين عطول تروحوا عليها.

١. كون أموري Con Amore، بعبدات

عبارة عن بيت خشب مخبى بالطبيعة وبقدم أشهى وأطيب الصحون الإيطالية من بيتزا وباستا وسلطات مع جو رومانسي وأضوية خفيفة وشموع. هيدا المطعم موقعو كتير مميز بالجبل وقعدتو كتير مهضومة ومكنكنة حد النار، أكلو رح ينقلكن على إيطاليا من أول كدشة.

الرقم: 628 196 71

٢. لوتر بيسترو L’autre Bistro، الحمرا

طبق الستيك، الجبنة مع الزيتون والخبز، البيتزا، السلطات والنبيد الأحمر… رح تاكلوا السفرة الفرنسية اللذيذة مع قعدة مزينة بالورود بهيدا المكان يلي بينبض بالجو الحلو والدافي. ما تنسوا تتركوا محل ببطنكن للحلو من الفوندان الدايب لطبق البان بردو والغاتويات المميزة والإدارة والموظفين عندن بجننو، والأجواء لطيفة كتير.

الرقم: 798 711 81

٣. لا بلاس دو لانتروكوت La Place de L’entrecôte، الكاسليك

هل محل عبارة عن مطعم رومانسي بيتميز بالأطباق الفرنسية لي بحضرها، خصوصي بطبق ستيك لانتروكوت مع بطاطا وسلطة بتطير العقل وبفوندو الجبنة الدايبة، كل شي شغل إيد وبطريقة مميزة مع خلطات وصوصات بيتوتية بتستحلوها بهيك طقس وكمان خرج قعدة مع الحبيب. المطعم كوزي كتير ومكنكن ودافي، الأضوية خفيفة مع شموع وموسيقى رومانسية للعشاق والأكل لا يعلى علي.

الرقم: 686 688 03

شوفوا كمان، ٥ مطاعم أصيلة لازم تجربوها بطرابلس.