لقينالكن بيوت ضيافة مكنكنة ورومانسية ببعقلين

بين دير القمر وبيت الدين بتلاقوا جوهرة بعقلين الشوفية، جارة الجبل ومصيف مميز لكتار. بعقلين عندها جمالها الخاص بالخريف والشتي، لما تكون طبيعتها الجبلية مزينة بالألوان الدافية أو التلوج البيضا، بتجذب الناس لعندها وليقضوا فيها أحلى الأوقات. ولأنو قريبة على أجمل المعالم الأثرية والسياحية، صارت مقصد أساسي بالشوف. عملنا برمة على الضيعة ولقينالكن أجمل بيوت الضيافة ببعقلين، بيوت كتير مكنكنة وحلوة.

1. بيت لانار

بيت لانار بيت القناطر بضيعة بعقلين. عندو جو بيتوتي مكنكن، تفاصيل بسيطة وملونة، بلكونة بتطل على مناظر جبلية خلابة. الصبح ناطرتكن ترويقة لبنانية طيبة مع نفس جبلي وقعدة رواق بترد الروح!

الرقم: 088 514 70

2. بكرزاي

هالمطرح عبارة عن كذا بيت ضيافة على الموديل اللبناني التراثي والقديم. عندن كل وسايل الراحة والخدمات المميزة، وأحلى شي انو بموسم الأعياد هالمطرح بيضوي بزينة العيد وكنكنة بيوت الجبل. عندن ديكور رومانسي مع قعدات جنب الصوبا، جنينات واسعة مع قعدات تحت الصنوبر والزيتون، ومناظر جبلية خلابة.

ومش بس هيك، عندن مطعم بيقدم أكل طيب مع فيو بتاخد العقل! مطرح مميز لتقضوا شهر العسل مع الشريك. واحد من أجمل بيوت الضيافة ببعقلين.

الرقم: 020 512 03

3. كاتلبا

هالبيت المودرن عندو ميزات رح تسحركن، من مسبح دافي بقلب غرفة النوم للتصميم الفخم والمرتب ومناظر بعقلين الخيالية.

من قلب كاتلبا، بتقضوا أوقات خاصة مع الشريك وبتنبسطوا بترويقة لبنانية بحضن الجنينة.

الرقم: 089 093 03

خبرونا، حبيتوا مشوارنا على أجمل بيوت الضيافة ببعقلين؟

شوفوا كمان، ٦ من أجمل بيوت الضيافة بعكار القديمة