٦ تجارب إستثنائية بالبقاع بالخريف

من أروع المناطق اللي نزوروها بالخريف هي منطقة البقاع بأكملها، من البقاع الغربي لحد بعلبك-الهرمل. هالمنطقة بتتميز بالجرود الشاسعة والجبال العالية والسهول الخضرة و الأراضي الرطبة، غنية بالآثار التاريخية والتراث اللبناني القديم و المناطق الزراعية. لكل محبي الريف وحابين ينبسطوا بالخريف قبل ما تفوت علينا الشتوية، بتلاقوا مناظر و تجارب إستثنائية بالبقاع خصوصي بهالفترة، خلينا نتعرف عليها بهالمقال! 

1. إبرموا أسواق ضيع البقاع بوقت موسم اللقطين

موسم اللقطين من أحلى مواسم القطاف بالبقاع! بتكون الأسواق مزينة بالألوان والمنظر كتير مهضوم، فلحقوا حالكن قبل ما يخلص الخريف. 

2. كفوا على محمية عميق للأراضي الرطبة

بتلاقوا بضيعة عميق أكبر محمية للأراضي الرطبة بلبنان، منظر السهول المصفطة بالألوان الخريفية والحصاد الزراعي بياخد العقل! بتروحوا بتتمشوا بهالمنطقة وبتاخدوا أجمل الصور!

3. قضوا نهار مميز عند دير تعنايل 

منظر تعنايل بهالفترة من السنة خيالي، ورق الشجر الأصفر والأحمر جنب البحيرة، المزرعة مع حيوانات الريف، جو الضيعة والمونة والأكل البقاعي الطيب، وقصص كتير ممتعة. مطرح بيضمنلكن نهار خريفي حافل! 

4. عيشوا تجربة مميزة بأحضان الطبيعة بمنطقة عيون أرغش 

بتلاقوا صوب هرمل والقرنة السودا منطقة خلابة بالخريف، مغمورة بالبحيرات والشجر الأصفر والتجارب الجبلية الحلوة والممتعة اللي بتناسب العيل وضهرات الأصحاب وحتى العشاق. لتعرفوا كيف تقضوا نهار مميز بهالمنطقة، شوفوا مقالنا هون. 

5. زوروا معصرة شاتو كسارة بزحلة 

البقاع معروفة بصناعة النبيد وزراعة كروم العنب، وبتبقى مقصد لمحبي النبيد المحلي والمعاصر التراثية، وأهمها معصرة شاتو كسارة. هالمعصرة وحدة من أقدم المعاصر بلبنان وصرلها من سنة ال 1857، بيقدموا تجربة تذوق نبيد مميزة، جولات بين كروم العنب، ونشاطات حلوة بالطبيعة. 

الرقم: 495 813 08

6. إكتشفوا محمية الغزلان بأحضان البقاع 

بتعرفوا انو في محمية غزلان بالبقاع؟ بتروحوا على هالمنطقة الساحرة وبتتفرجوا على الغزلان بقلب الغابة. 

خبرونا بالتعليقات، حبيتوا شو إخترنالكن تجارب إستثنائية بالبقاع للخريف؟

شوفوا كمان، ٦ من أجمل بيوت الضيافة بعكار القديمة