٣ مطاعم بضهور الشوير مع قعدة بتطير العقل

عبالكن قعدة حجر شتوية مع نار وجو دافي ومكنكن وأكل طيب؟ شوفوا هل- ٣ مطاعم بضهور الشوير مع قعدة بتطير العقل.

١. مطعم السد

هالمطعم المميز عندو قعدة شتوية دافية ناطرتكن مع أطيب المأكولات اللبنانية البيتوتية، من المازة للمشاوي لفنجان القهوة بعد الأكل. بس تشتي الدني بتكنكنوا جوا حد النار وبتتفرجوا على المي وبتسمعوا صوت الشتي إنتو وعم تلقمشوا بطاطا مشوية مع فنجان شاي. مش بس هيك، الولاد عندن محل يلعبوا ويتسلوا إنتو وعم تستأنسوا حد النار. هالمطعم هوي عبارة عن مخبى من الشتي والبرد ومن عجقة المدينة لعشاق الجبل والهدوء.

الرقم: 358 895 03

٢. كركة الحج

بتلاقوا عند هالمحل قعدة تقليدية بقلب بيت حجر عتيق ومعتق وعندو نفس الضيعة. القعدة بكل تفاصيلها عند هالمطعم رح تصير ذكرى ما بتنتسى من الأضوية الخافتة والمصابيح للقمة البيت لي رح تخليكن تنسوا همومكن شوي زغيرة. بقدم الكركة تشكيلة كبيرة وكريمة من أطباق المازة اللبنانية، والأطباق الغريبة، والكبة بالجرن بقلب مغارة عقد بعيدة عن العالم والعجقة والهموم. مش بس الأكل رح يبهركن، كمان ديكور المحل لي كتير ساحر مبهر، حيطان حجر وقناطر معلقين عليها صور أثرية لسكان الضيع بلبنان… شي كتير بريح النظر والنفسية.

الرقم: 692 390 04

٣. ذا باتشرز كريب The Butcher’s Crib

هالمحل عبارة عن بيت حجر عتيق عندو كل أنواع اللحمة لي بتشتهوها بالشتوية مع كاس نبيد لتدفوا بطنكن. عندن قعدة مهضومة وبتجنن خرج جلسة أصحاب وحبايب رح تخليكن تنسوا همومكن! وأهضم شي القعدة على البار، الكراسي جلد مريحين والطاولات خشب. بتطلبوا برغر، ستيك، لحمة مدخنة أو حيلا شي من الspeciality تبعن بيجوا من الشواية على صحنكن دغري مع بطاطا مقلية ولا أروع. أما الجو البارد برا ما رح تحسوا في جوا من ورا الشوميني والنبيد والأضوية الخافتة. كل شي بالمحل رح يخليكن تحسوا إنكن قاعدين بقلب مطعم بنص سويسرا وبعيد عن الدني!

الرقم: 549 884 71

حبيتوا المشوار على أطيب مطاعم بضهور الشوير؟

شوفوا كمان، لقينا ٣ مطاعم بعاليه مع قعدة بتطير العقل.