٦ من أجمل بيوت الضيافة بعكار القديمة 

عكار جوهرة منسية بالشمال، فيها جمال خيالي وجو ريفي مميز وطبيعة ساحرة متل سهل القموعة، وادي جهنم، شلالات عكار العتيقة و بقرزلا، وغيرها، عداً عن المواقع الأثرية التاريخية بالمنطقة. كتار من محبي الطبيعة والتخييم بيتوجهوا على عكار ليكتشفوا المنطقة، خصوصي بالخريف والشتوية لما يكون منظر الغابات بياخد العقل. لكل اللي عبالن يقضوا كم نهار بأحضان حوهرة الشمال العكارية، خلونا ندلكن على 6 من أجمل بيوت الضيافة بعكار. 

1. La Mounia، القبيات 

ضيعة القبيات من الأروق والأجمل بعكار، وبتلاقوا بقلب هالضيعة بيت ضيافة مميز على الموديل اللبنانية القديم. البيت مغمور بالشجر من كل الميلات، فيه أوض مريحة و فرن للبيتزا و جنينة كبيرة ومسبح وملعب فوتبول وقعدة نار مميزة. 

وقريب من البيت بتلاقوا مطحنة أثرية عمرها أكتر من 200 سنة! مكان كبير ومريح للجمعات والعيلة. 

الرقم: 638 154 70 

2. البيت الأزرق، بينو 

البيت الأزرق بضيعة بينو الزغيرة عبارة عن بيت لبناني أثري بشبابيك وبواب زرقا، مع جنينة مهضومة.  

هالبيت بيتميز بالديكور القديم والكلاسيكي، والقعدة الشرحة المكنكنة. مكان بتلاقوا فيه راحة البال والرواق! 

الرقم: 325 689 71

3. جبلنا إيكولودج، القبيات 

بتلاقوا بقلب هالبيت المكنكن القعدة الجبلية المزبوطة! مكان بياخدكن على ريف عكار بكل تفاصيلو. الحلو انو هالمطرح قاعد بحضن الغابة، وعندو صبحيات رواق ما بتتفوت! 

الرقم: 935 542 03

4. شاليهات الشوح، فنيدق القموعة

بيوت خشب مميزة ناطرتكن انتو وعيلتكن لأحلى عطلة شتوية بعكار. شاليهات الشوح قاعدة بين الشجر بالقموعة، وحدة من أجمل الضيع بلبنان، ولما تتلج الدني المنظر روعة! ولتعرفوا كيف فيكن تقضوا نهار كامل مع عيلتكن بالقموعة، شوفوا المقال هون. 

الرقم: 914 242 03 

5. منتجع الكهف، فنيدق القموعة 

لكل العشاق اللي عم بيفتشوا على قعدة جبلية خاصة ورومانسية، لازم تجربوا منتجع الكهف. مطرح بتحسوا حالكن كأنكن قاعدين على حفة العالم!

مش بس عندو قعدة ساحرة من فوق الجبل، بس كمان ترويقة وصبحية خيالية بحضن الطبيعة. 

الرقم: 103 411 70 

6. بيت عندقت، عندقت 

هالبيت مليان بساطة و رواق، متل كل بيوت الضيعة بعندقت. المميز انو عندن ترويقة طيبة وكتير قريب على دروب المشي بالمنطقة! 

الرقم: 554 195 70 

خبرونا بالتعليقات، حبيتوا مشوارنا على أجمل بيوت الضيافة بعكار؟

شوفوا كمان، ٥ مطارح بتسفركن على سويسرا من قلب لبنان