أهضم لحظات منتذكرها من إيام الإمتحانات بالمدرسة

من أخطر اللحظات عند تلاميذ المدرسة هيي لحظة الإمتحانات بالمدرسة بس هلق صرنا منتذكرها بضحكة وحسرة. لأن كنا نكون مش حافظين الدرس منيح أو نتلبك أو حتى ننسى كل شي درسنا بلحظة، اليوم عبالنا نرجع ل أهضم لحظات منتذكرها من إيام الفحوصات بالمدرسة، إيام المدرسة لي ياريت بترجع، كانت ذكريات حلوة خالية من مسؤوليات الحياة.

١. بس يجبرونا نحط كتاب بنص الطبقة

حتى ما نتنقل عن بعض ومنصير ملبكين بقعدتنا وكيف بدنا نكتب، بس عطول في هيدا الشخص المحتال لي بضل يقدر ينقل لو شو ما صار

٢. في يلي بيجي معو راشيتا

بيبقى ناقل كتاب التاريخ على راشيتا قد الفقوسة فيها كل شي وخطها زغير على الآخر والله بيعرف كيف بيبقشع

٣. صاحب الورقة البيضا

بيجي مش دارس شي بحط إسمو وبفل وحتى ما إلو جلادة ينقل

٤. عطول في ناظرة بتخلي التلاميذ ينقلوا

كلنا منتذكر هل ناظرة لي بتخلي التلاميذ ينقلوا والكل بصلي تجي وقت الفحص وما يجي حدا غيرا

٥. يلي ما بيمرض غير وقت الفحص

وبلاقيها حجة ليهرب هريبة من الإمتحان وما حدا بقلوا شي

٦. يلي عطول مأخر

مش ملحق يخلص الفص وعطول بدو وقت زيادة وبيبقي كاتب فوق ال٥ صفحات وبطلت تساع الورقة تبعو

٧. الشخص يلي بخلص بكير

ما حدا بيعرف كيف بس عطول بحوص وبقدم فحصو أول شي قبل الكل

٨. يلي بيعرف يساير

بيعرف يساير المعلمات والناظرة وهيك بمشي أمورو على السكت وما حدا إلو قلب يزعلوا

٩. يلي بضل ينق وإنو هوي مش عامل منيح

بيطلع بعدين هوي الأول بالصف ومسكر كل الفحوصات

١٠. يلي مش دارس غير درس واحد

وبتشنص معو وما بيجي غيرو وقت الفحص وهيك بسكرو

١١. أحلا شي الإضرابات

شو كنا نكيف بس يعلنو النهار لي عنا في فحص إضراب شو كنا نكيف إنو قاعدين بالبيت

وإنتو شو بتتذكروا من إيام الإمتحانات، خبرونا بالكومانتس.

شوفوا كمان، من أرشيف الزمن الجميل، ٢٠ صورة نادرة للست فيروز.