٥ مطارح بتسفركن على سويسرا من قلب لبنان

عبالكن تسافروا على سويسرا من دون ما تسافروا برا لبنان؟ سويسرا بتتميز بجمالها الريفي، جبالها العالية والمنحدرة المغطاية بالتلوج، بيوتها الخشب المخباية بين الشجر والتلال الخضرة والبحيرات، النبيد والحلويات والمخبوزات الطيبة من الجبنة والشوكولا السويسرية الشهيرة. وكرمال تحصلوا على تجربة مشابهة بلبنان، خلونا نروح على 5 مطارح بتاخدكن على سويسرا من قلب لبنان.

1. وود هيلز، ميروبا

وود هيلز عبارة عن منتجع حلو بالصيف والشتي، عندو بيوت خشبية متل البيوت السويسرية ومناظر ساحرة للجبال المنحدرة والوديان العميقة. منتجع وود هيلز مخبى بين غابات وصخر ميروبا، هالمطرح بيقدملكن تجربة مميزة وفيها كل وسايل الراحة.

وبالشتوية لما تنغمر كسروان بالتلج، هالبيوت بتأمنلكن تجربة دافية ومكنكنة بحضن الطبيعة.

الرقم: 786 177 76

2. Auberge Le Valais، فاريا

هالأوتيل والمطعم المميز بفاريا بيقدم التجربة السويسرية الأصيلة. بتجربوا أطباق جبنة الراكليت السويسرية مع ستيك شهية وكاس نبيد.

عندن الديكور بالغرف والمطعم مستوحى من التراث السويسري مع لمسات فاخرة بتحسسكن إنكن سافرتوا عنجد.

الرقم: 227 552 70 – 227 552 03

3. Le Montagnou، كفردبيان

هالأوتيل المميز قاعد بين الجبال بكفردبيان ومغمور بالتلوج البيضا بالشتي، عندو ديكور بياخدكن على سويسرا بكل تفاصيلو الخشب.

عندن أطباق الجبنة السويسرية الدايبة، أكل دافي، نبيد طيب، وعشوات فاخرة ومكنكنة بالجبل.

الرقم: 441 341 03

4. Le Cedrus Hotel، بشري

أوتيل ومطعم Le Cedrus مخبى بين الأرز وعندو مناظر جبلية ساحرة.

أوتيل بيشبه البيوت السويسرية بالريف وعندو أكل طيب وقعدة مكنكنة.

الرقم: 777 413 70

5. أرز فاريا، فاريا

عند أرز فاريا بتعيشوا التجربة السويسرية بقلب بيوت خشبية مميزة مع مناظر جبلية بتاخد العقل.

بيوت خشبية بقعدة أبداً ما بتتفوت هالموسم لما تتلج بفاريا!

الرقم: 467 109 03

خبرونا، حبيتوا المشوار على سويسرا من قلب جبال لبنان؟

شوفوا كمان، ٥ مطاعم مكنكنة لعشا رومانسي مع الشريك بلبنان