٥ مطاعم إيطالية مكنكنة لازم تجربوها ببيروت

في أحلى من الأكل الإيطالي وكاس نبيد من عشية مع حدا كتير بتحبوا؟ تعوا تعرفوا على أحلى القعدات الإيطالية المكنكنة بهل ٥ مطاعم ببيروت!

١. دا صوفيا Da Sophia، بادارو

أول ما تفوتوا على دا صوفيا رح تحسوا حالكن انتقلتوا على إيطاليا، من الديكور للقعدة للأكل، التجربة هون ما لازم تروحوها عحالكن. الأكل بيوصلكن على شراشف حمر وبيض مع أطباق إيطالية شهية من البيتزا للباستا للسلطات مع البوراتا والخلطات المميزة. بتعيشوا أمسية مميزة مع الحبيب!

الرقم: 552 995 70

٢. لا كازا دي باستا La Casa Di Pasta، الحمرا

محل زغتور مكنكن بالشتوية وعندو قعدة قديمة وتراثية متل قعدات الموجودين بشوارع ميلانو… طاولات خشب وشراشف ملونة وأكل بيتوتي مع موسيقى رايقة. جربوا الباستا لي مشهور فيها المحل “البونغوستو” وضروري تجربوا كمان “البيتزاتا” لأن رح تنغرموا بالعجينة الرقيقية والطعمة القوية.

الرقم: 740 371 01

٣. لويجي كوتشينا Luigi Cucina Italiana، الأشرفية

عبارة عن بيت الأكل الإيطالي التراثي ببيروت. من أجمل وأطيب المطاعم الإيطالية بالعاصمة، قعدتو كتير رواق ومرتبة، وأكلو بشهي. بالصيفية القعدة مهضومة على التراس، إذا زبطت معكن تجوا على وقت غروب الشمس، رح تشوفوا أحلى غروب. ولما تخلصوا، خليكن للسهرة لتستمتعوا ببيتزا بتشهي وأجواء سحرية. أما بالشتوية بتقعدوا جوا بقلب المطعم، بقلب قعدة دافية ومميزة. بيتزا رقيقة، سلطات طازة، باستا روعة، مأكولات بحرية على الطريقة الإيطالية، وقعدة بتاخد العقل بمطعم رومانسي.

الرقم: 622 218 01

٤. بافاغلينو Bavaglino، الأشرفية

قاعد على درج مار نقولا… طلعوا لفوق مع حبيبكن وبس توصلوا بتلاقوا الأضوية الخفيفة مع طاولات خشب وشرشرف أحمر وموسيقى طليانية ناطرتكن. فرن الحطب بحضرلكن أطيب بيتزا مع كل المكونات الطيبة، وبهل وقت بتكونوا مزمزتوا كاس نبيد بجنن مع حبيبكن بهيدي الأجواء الروعة.

الرقم: 080 091 81

٥. ماما إين كوتشينا Mama in Cucina، الجميزة

أضواء حميمة وأجواء إيطالية بإمتياز رح تلاقوها عند هل محل لي بقدملكن الطبخات البيتوتية الإيطالية ووصفات غير شكل. القعدة كتير مكنكنة مع طاولات وكراسي خشب وشراشف مليونين بتخليكن تحسوا حالكن بشي ضيعة بإيطاليا. الأكل كتير لذيذ، الصوصات كتير مرتبين وعندن أكتر من 10 أنواع بيتزا وبس يكون الطقس بارد جربوا شوربة الفطر لتدفوا قلبكن. وحتى تستمتعوا بالتجربة الطليانية على الآخر، تركوا محل ببطونكن للحلو الطلياني.

الرقم: 530 400 81

شوفوا كمان، ه مطاعم مع قعدة مكنكنة بلبنان.