٥ مطاعم فرنسية لازم تجربوها بلبنان

شو في أحلى من قعدة دافية بمطعم فرنسي مع جو رومانسي بياخد العقل وأكل بشهي؟

١. زيرالداZéralda ، جونية

مطعم فرنسي قاعد بنص جونية بيتميز بالمطبخ الفرنسي اللذيذ وبقدة مكنكنة بالشتوية وقعدة جنينة بالصيفية. بقدم أطيب الأطباق لي خرج قعدة رومانسية متل البزاق والستيك والسومو وأكيد مع الحلو الفرنسي والمشروبات الباردة والدافية حسب ما عبالكن.

الرقم: 787 932 09

٢. كوكلي بيسترو Couqley Bistro، الجميزة

هل مطعم بيتميز بقعدة رومانسية بين طاولات الخشب والشراشف البيض والحمر وبياخدكن على شوارع باريس من قلب بيروت. بقدم مختلف الأطباق الفرنسية والحلو والسلطات المميزة والساندويشات. غير هيك، ضروري تجربوا عندو تشكيلة النبيد الفرنسية لأن طعمتها دافية ومش قوية كتير مناسبة لدردشة رومانسية مع الحبيب.

الرقم: 904 912 81

٣. فرنش كانتين French Canteen، برمانا

هل محل قاعد بالbroumana yard بنص السوق مطرح ما بتلاقوا مجموعة من المطاعم ناطرتكن. ما صرلو زمان فاتح، بالصيف فيكن تقعدوا برا وتستمتعوا بالفيو الروعة، بس بالشتوية كمان الجو كتير حلو جوا. استمتعوا عندن بأشهى منيو فرنسي بأطباق متل ساندويشات، برغر وسمك وقصص طيبة، بس الأكلة الرئيسية عندن هيي الستيك مع البطاطا المقلية والصوص الشهية.

الرقم: 188 145 03

٤. لانتروكوت La Place de L’entrecôte by Mr Joe، الكاسليك

أحلى شي بهالمحل هوي إنو لما تفوتوا لجوا بتحسوا حالكن صرتوا بباريس وبتحسوا بالزينة الرومانسية مع الأضوية الخافتة والشموع. موسيقى رومانسية، والمأكولات الفرنسية اللذيذة وأطيب شي عندو طبق الستيك والسلطة مع البطاطا والصوص الشهية، والدفا المريح ناطركن. هونيك حتستمتعوا بجو حلو من الأكل والمزاج الجيد.

الرقم: 686 688 03

٥. لوتر بيسترو L’autre Bistro، الحمرا

طبق الستيك، الجبنة مع الزيتون والخبز، البيتزا، السلطات والنبيد الأحمر… رح تاكلوا السفرة الفرنسية اللذيذة مع قعدة مزينة بالورود بهيدا المكان يلي بينبض بالجو الحلو والدافي. ما تنسوا تتركوا محل ببطنكن للحلو من الفوندان الدايب لطبق البان بردو والغاتويات المميزة والإدارة والموظفين عندن بجننو، والأجواء لطيفة كتير.

الرقم: 501 742 01

شوفوا كمان، جولة سياحية بقلب جبيل القديمة.