متحف ال١٠٠ بيت بالبترون، شو قصة متحف هنري لوسيان؟ 

بتعرفوا متحف ال١٠٠ بيت بالبترون؟ متحف هنري لوسيان مطرح ما بيشبه غيرو بالشمال، بيروي قصة حب بين المهندس المعماري هنري لوسيان وبيوت بيروت العريقة. هالمتحف بمثابة ذاكرة لبيروت الحلوة، بيخبّر عن جمالها وبينقل روحها على البترون.

كيف بلشت قصة هالمتحف؟

هنري لوسيان مهندس معماري لبناني، لقى حالو بأسلوب العمارة البيروتية والفن اللبناني القديم. إنغرم بمدينة بيروت، بتاريخها، وتراثها، وبيوتها، وكان حلمه يسكن بقلب بيت بيروتي قديم. ومن بعدها قرر لوسيان يحقق حلمه من قلب بيت لبناني تراثي بالبترون اللي بعدها تحوّل لمتحف.

إلهام لوسيان ليعمر بيت بيروتي تراثي ما كان عادي. كان يبرم بشوارع بيروت، بالأشرفية، عين المريسة، راس بيروت، البسطة، برج أبي حيدر، وغيرن، ويتأمل بالبيوت القديمة اللي عم تنهدم. كان يسأل عمّال الهدم وين حتروح قطع البيت، عواميدو الرخام، شبابيكو، حيطانو، إكسسوارتو، وكان يخبروا انو رح تنباع. وهون قرر لوسيان يشتري قطع البيوت المهدومة ويعمر فيها بيت أحلامو.

على مدى خمس سنين، برم لوسيان بين بيوت بيروت الأثرية المعرّضة للهدم، وجمع منها تراث معماري ما بيتقدر بتمن، من قناطر خشبية، بلاط ودربزينات، قزاز ملوّن، قطع فنية، وغيرها.

وليحافظ على تاريخ كل بيت من هالبيوت، كان يوثّق كل قطعة أثرية بالصور قبل ما تمّ عملية الهدم البيت، وكمان بعد ما يجمعها ويركبها ببيته الجديد. فبتلاقوا بمتحف هنري قطع أثرية من 100 بيت بيروتي مهدّم، بتشكّل كنز تاريخي غني وعريق.

وبعد ما إكتمل بيت لوسيان الفريد من نوعه، قرر يحولو لمتحف أثري بالبترون من شدة جماله. متحف أثري مألف من 100 بيت قديم انهدم ببيروت، بيتضمن صور وملحقات وموقع كل بيت وأي منها تم تحويله وإعادة تأهيلو. هالمتحف بيقدم فرصة للناس لتتعرف على التراث وتشوف بيروت من عيون لوسيان، لوحات هو رسمها على حيطان هالبيت، وفن مطرّز زوجته الفنانة إبدعتوا على العفش القديم.

من شو مألف المتحف؟

البيت أو متحف هنري عبارة عن 3 طوابق، وهو ساكن بالطابق الفوقاني، والطابق الأرضي مفتوح للزوار.

بتلاقوا دار واسعة بتتوسط البيت بين غرف النوم والإستقبال. بيتميز بالحيطان المزخرفة، البلاط الرخامي، القناطر المحفورة بدقة وفنية، القزاز الملون، التريات الفاخرة، اللوحات المعلّقة، شراشف مطرزة، المفروشات الأثرية، و الألوان المفرفحة من الأبيض والزهر والأزرق. متحف حتى الحيطان والقناطر بتحكي فيه عن هوية بيروت الأصيلة وتراثها. هنري لوسيان قدم هالمساحة لكل المهتمين بفن العمارة، زيارة المعارض، ومحبي التراث اللبناني.

كيف فيكن تزوروا هالمتحف الأثري؟

بتلاقوا متحف هنري لوسيان بضيعة كوبا بالبترون، والدخولية على المتحف ب 5 دولار.

لحجز زيارتكن أو الاستفسار، اتصلوا على 654 753 03. ولتعرفوا أكتر، تابعوا حسابن على الإنستغرام هون.

خبرونا، حبيتوا المشوار على متحف هنري لوسيان؟

شوفوا كمان، مين هي الأيقونة اللبنانية وأول عارضة أزياء عالمية عربية؟