لأن بين تشرين وتشرين صيف تاني: ٥ محلات بوظة منعشة بلبنان

إذا مفكرين إنو البوظة بس محصورة بالصيف بلبنان فإنتو غلطانين كتير، فيكن تاكلوها طول إيام السنة وصدقونا ما رح تزهقوا. عنا بلبنان محلات بوظة بتقدم أنواع مختلفة ومميزة من هالحلوى المنعشة بكل أوقات السنة من نكهات عصرية لأصناف تقليدية، رح نخبركن عن بعض هل محلات لي عندن كل أنواع البوظة اللذيذة والمنعشة. فإذا كنتوا عبالكن شي حلو، تعرفوا معنا على ٥ محلات بوظة منعشة بلبنان.

١. لا غلاس دو باديان La Glace de Badiane، النقاش

بيتميز بطعمات جديدة وإختراعات ما بتلاقوها بغير محل متل البوظة على غاردينيا والبوظة على لافندر. غير هيك، البوظة لي بحضرها بيتوتية مية بالمية وخالية من المواد الحافظة والملونات وطعمتها خفيفة وطيبة كتير ومنعشة.

الرقم: 884 844 03

٢. حلمي Hilmi’s، البترون

هل محل عبارة عن بيت الليموناضة بلبنان، بتلاقوا عندو أطيب أنواع البوظة وشراب الليموناضة. كل شي معمول من ليمون فريش وفواكة طبيعية لتحلوا ضرسكن على المزبوط وتبوردوا قلبكن.

الرقم: 036 173 70

٣. آيس كريم الملك، الشياح

مشهور بالعروضات لي بيعملها، وخاصةً البوظة على أوريو ولوتس. عطول بيبتكر طعمات جديدة وبحضرلكن بوظة غير شكل من المكونات لي بحبها قلبكن وأكيد أهم عناصر فيها هني الفستق والشوكولا.

الرقم: 315 668 76

٤. بوظة القزيلي، زوق مكايل

بيعملوا بوظة لبنانية طيبة كتير يلي بميزها هيب ألوانها لي بتلون اللسان والتم وبتلاقوا عندو كل الطعمات لي معودين عليها وبحضر أطيب نكهات طبيعية منعشة.

الرقم: 706 670 03

٥. بوظة القلعة، جونية

هالمحل متل الحلم، كل شي عندو بشهي، البوظة عندها طعمة سحرية والألوان بتدوب بالتم وبتاخدكن على عالم تاني. أطيب نكهات منعشة بتلاقوها عند القلعة، الطعمات المفضلة لي رح تحبوها أكتر شي هني الحلاوة، القشطة، الراحة، الأفوكا والنسكافه.

الرقم: 100 034 71
الفروعة: صربا، زوق مصبح، كفرسرون، الأشرفية، العقيبة.

شوفوا كمان، ٥ أنواع كنافة بتلاقوهن بس بلبنان.