٧  كافيهات مخباية حول لبنان لازم تجربوها

إذا كنتوا من محبي  الكافيهات والقهوة الطيبة، خلونا نعرفكن على ٧  كافيهات مخباية حول لبنان لازم تجربوها. 

1. The Coffee Book، جبيل

ما في أروق من جلسة مع كتاب وفنجان القهوة. هالكافيه عبارة عن مقهى ومكتبة بنفس الوقت، بتستقبلكن على قعدة من رفوف الكتب، القهوة الطيبة، والجو الرايق بجبيل. 

الرقم: 876 111 70 

2. Paradise Café، طرابلس

هالكافيه الملون عندو جو مفرفح و قعدة لطيفة بتدخل السعادة على القلب. إذا عبالكن تجربوا milkshake بنكهات طيبة وتلعبوا board games مع أصحابكن، لازم تجربوا هالمحل.   

3. Oakura، عين عار

كافيه مميز بيعمل قهوة محمّصة ريحتها بتشق القلب. عندو قعدة مناسبة للشغل أو الدرس، وبيعمل سهرات موسيقية وفنية مميزة لتغيروا جو.

الرقم: 719 443 03

4. 11:11، مار إلياس

جوهرة مخباية ببيروت ومقصد مميز لمحبي القهوة بمار الياس. عندن جو رايق الصبحيات، فيكن تروقوا راسكن عندن على قهوة، تشتغلوا أو تدرسوا على الهدا، وتجربوا مخبوزات طازة مع مشروبات طيبة. 

5. Dreamers Bookshop Café، الجديدة

كمان هيدا الكافيه اللطيف مطرح غير شكل لمحبي القراية والكتب. بتقعدوا وبتشربوا قهوة طيبة، بتدوقوا مخبوزات خفيفة، وبتتعرفوا على ناس جديدة. 

الرقم: 563 187 03

6. Salomé Sweet Shop، برمانا

كافيه بيحلي نهاركن بأطيب الحلويات، من ال pancakes المغرقة بالصوص، الكوكيز والقهوة، ال muffins السخنة وقصص كتير طيبة.  

7. Little Byblos، جبيل

ليتل بيبلوس عبارة عن كافيه مكنكن وزغير بالسوق العتيق مع فيو مميزة لقلعة جبيل. بتجربوا أطيب قهوة عندو وبتكملوا مشواركن على أحلى المواقع بالمنطقة. 

خبرونا بالتعليقات، شو بتعرفوا كافيهات مخباية بلبنان لازم نجربها كمان؟

شوفوا كمان، أحلى ٦ كافيهات بشارع الحمرا