٩ مطاعم جبلية ساحرة بشمال لبنان

شمال لبنان هوي الكنز الساحر ببلدنا. المشهد من جبال الشمال روعة، أهل الشمال طيبين، ودودين ،وثقافتن متعددة وقريبة على القلب وكمان حكين حلو . كيف فيكن تتمتعوا بهالجوهرة للآخر؟ أكيد مع الكاس واللقمة الطيبة. منقدملكن بالمقال 9 من أكتر مطاعم الجبلية بشمال لبنان المفضلة عنا.

١. زهرتوني، القبيات

أول ما تفوتوا على المطعم بتحسوا حالكن عم تفوتوا على بيت قديم وعتيق مع شبابيك ملونة متل بيوت الضيعة، بس من جوا غير شكل وعندو كل القعدات الحلوة. عندن قعدة مهضومة كتير دافية جوا وقعدة جنينة برا بين الشجر والوديان. اللي بميز هل مطعم إنو بحضر باستا بيتوتية شغل إيد، وبطريقة مميزة مع خلطات وصوصات من ديات الشيف بتستحلوها بهيك طقس! وكمان عندن بيتزا وسلطات على أنواعها وأطباق إيطالية شهية.

الرقم: 844 469 81

٢. بيت هيفا، الكورة

ما في أحلى من القعدة بهيك طقس بمطعم جبلي بين شجر الزيتون وكراسي القش وصوت الزيز والعصافير عم يغمر دينيكن. عندن قعدة مهضومة برا بين الشجر والأضوية الخافتة، وقعدة جوا بقلب بيت حجر عتيق لتستمتعوا بأطيب أنواع الأكل اللبناني حسب شو عبالكن. مش بس رح تنبسطوا بالقعدة، بيت هيفا بدللكن ع المزبوط لأن بحضروا كمان مونة بيتوتية بتستحلوها بهيك طقس.

الرقم: 152 513 03

٣. أبو النواس، الضنية

هالمطعم بيشبه القصور الملوكية القديمة من خلال طريقة تقديمن للأكل والقهوة. القعدة الجوانية بتشبه القصور العثمانية المعتقة، أما القعدة برا شرحة وبتطل على منظر الجبل كلو. الأكل بشهي كتير، بتلاقوا كل أطباق المازة اللبنانية من مختلف الألوان والطعمات والكمية كريمة، وخصوصي صحون المشاوي والكبة على الفحم. بس تخلصوا بتضيفوا فواكة وقهوة وبتسرحوا بهل جمال كلو وبالناس الطيبة.

الرقم: 224 222 06

٤. قهوة الأرز، الأرز

القعدة بين الأرزات إلها حكاية خاصة رح ترجعكن لأجمل إيام الصيفية. ما في أحلى من القعدة بقلب الجبل، وأكل بسيط بالفخارة وأطباق لبنانية أصيلة وهوايات حلوين. بتطلعوا حواليكن وبتشوفوا الأرز كلو تحتكن، يعني منظر متل الحلم وطعمات بيتوتية بتستحلوها على الآخر.

الرقم: 797 448 70

٥. مطل الوديان، حرار

هالمطعم عندو مناظر جبلية ما بيتخيلها العقل! قاعد على الشير وعندو الجو مريح ورومانسي، والتصميم حديث و تقليدى مع إطلالة بتحبس الأنفاس، أما الأكل اللبناني فممتاز ومتنوع. أكل جبلي على الطاولات من صحون المازة المغنجة، فناجين القهوة على العصرونية مع هيك منظر، فواكة وحلو، وحتى في محل ليلعبوا الولاد. على فكرة منكن بحاجة تقعدوا برا لتشوفوا المنظر، بكفي تطلعوا من القزاز لتشوفوا أجمل مناظر لبنان.

الرقم: 487 713 03

٦. الفردوس، إهدن

القعدة الجبلية الأصيلة ناطرتكن عند الفردوس لي هوي إسم على مسمى لأن عنجد بيشبه جنة الفردوس. عندو الكبة الشمالية لي بحبها قلبكن، الأكلات اللبنانية، وبحضر أطيب كبب مشوية على الفحم ولا أطيب مع كاس عرق. بتسردوها على الموسيقى، هوايات إهدن الحلوين والمناظر الطبيعية الخلابة وقعدة القش.

الرقم: 701 060 70

٧. باب الهوا، إهدن

بعدنا بإهدن وهلق من وجه صوب محل عندو قعدة بتطير العقل مع منظر طبيعي ساحر مكشوف على كل الوادي المقدس. مطعم قاعد على الجبل، الفيو عندو بتشوفوا منها إهدن كلها من فوق. هون السما قريبة، فيكن تقعدوا على البلكون أو جوا تسولفوا وتعيشوا لحظات ما بتنتسى مع أطيب سفرة لبنانية وفنجان قهوة. والحلو بالقعدة جوا إنها من قزاز، يعني بتشوفوا منها جمال إهدن كلو وبتنغرموا فيها من أول نظرة.

الرقم: 047 456 03

٨. صخرة النهر، بشري

مطعم قاعد فوق التلة ببشري وبيطل على منظر الجبل، وأجمل شي عندو منظر الغروب كل يوم قبل عشية. حبنا لهل محل بينطلق مش بس من الفيو الروعة، بس من الأكل اللبناني الأصلي والسفرة الكريمة لي بتخليكن تحسوا قاعدين بالبيت عم تاكلوا بخير وصحة وبسط. ما رح تشبعوا من القعدة والأكل وريحة الطبيعة ورح تروقلكن راسكن.

الرقم: 085 100 03

٩. هيكل الشنبوق، القبيات

عمو هيكل عندو أحلى قعدة بالجرد برفقة الصنوبرات وشجر الشوح. هالمحل الساحر عبارة عن كوخ حجر مثالي بهيك طقس مع إطلالة بتحبس الأنفاس على كل المناظر الحلوة بالضيعة، ولقمة بتشق النفس. بقدموا نبيد محلي، وأكل بلدي من حواضر البيت، والجنينة معمولة بطريقة كتير جذابة وطيبة. حتى عندن بيت ضيافة زغير لكل مين عبالوا يقضي ليلة مميزة بهل ضيعة الجبلية الرايقة بعيد عن كل شي.

ملاحظة: هيدا المطعم بدو حجز قبل بوقت
الرقم: 650 329 03

خبرونا بالتعليقات، حبيتوا هل مطاعم الجبلية بشمال لبنان؟

شوفوا كمان، ٣٠ موقع أثري ضروري تزوروهن بلبنان.