كيف فيكن تقضوا أحلى مشوار الخريف بصوفر؟ 

ضيعة صوفر ضيعة ساحرة على المرتفعات الجبلية بعاليه، بتطل على وادي لامرتين والجبال، حمانا، وفالوغة، وغيرها من المناطق. واتسمّت “صوفر” بسبب صوت صفير الهوا بالصيف والشتوية، وكانت من زمان مركز سياحي وترفيهي راقي للأمراء والفنانين والسياسيين فتميزت بالفيلات الفخمة والقصور والأوتيلات الفاخرة وصارت مصيف لكل محبي الجبل. صوفر تعتبر من أجمل الضيع اللبنانية بالخريف، بتتزين شوارعها بالألوان الدافية وأجوائها التراثية الغنية. اليوم خلونا نشوف كيف فينا نقضي مشوار الخريف بصوفر.

إكتشفوا أجمل المطارح بالضيعة:

1. إبرموا بالسوق العتيق وبين الحارات القديمة

2. إكتشفوا محطة القطار وسكك الحديد المهجورة بصوفر

محطة كانت مليانة حياة ومعجوقة بالسياح، وكانت بتوصل سوريا ببيروت. بس صارت مهجورة وما بقي منها إلا محطة قديمة مخباية بين الشجر وبتطل على الوادي.

3. إستمتعوا بالإطلالة الجبلية الساحرة على كورنيش صوفر

كورنيش صوفر عبارة عن شارع طويل، مزين بالفيلات والقصور الفاخرة، بيطل على وادي لامرتين.

شارع مميز لتتمشوا فيه بين شجر الخريف، وتستمتعوا بمنظر غروب الشمس مع الحبيب.

4. خدوا أجمل الصور عند بيت صوفر

بيت لبناني تراثي بديكور ساحر الجمال، وبيستقبلكن لتاخدوا أحلى الصور عندن. تواصلوا معن على الإنستغرام هون.

زوروا أقدم القصور وأروع الأوتيلات الأثرية بصوفر:

5. زوروا غراند أوتيل صوفر الأثري

أوتيل تاريخي لعيلة سرسق من سنة ال 1892، وكان أول كازينو بلبنان وقريب لسكة الحديد بصوفر، ومركز للرفاهية جذب الملوك والأمراء والفنانين والسياسيين لحد من إجت الحرب الأهلية.

وهلق فيكن تزوروا الأوتيل الأثري لتتفرجوا على العمارة الخيالية والتفاصيل التاريخية، بيعملوا فيه معارض فنية وكتير أعراس.

6. زوروا قصر دونا ماريا سرسق وحدايقه الساحرة

قصر أثري بيشبه قصور الحكايات انبنى من قبل عيلة سرسق بال 1909، وصار مهجور من بعد الحرب الأهلية. بس فيكن تكتشفوا وتبوموا فيه وحتى تحجزوا هالمطرح وحديقته الحلوة لمناسباتكن الخاصة.

الرقم: 720 218 01

انبسطوا بنشاطات متنوعة بالمنطقة:

7. إبرموا شوارع صوفر على البيسكلات عند صوفر بايكس

بتركبوا على البيسكلات مع حبيبكن وبتبرموا كورنيش صوفر تحت شجر الخريف، نشاط كتير رومانسي!

الرقم: 633 844 78 – 118 092 81

8. خيموا بالطبيعة الجبلية عند فالي كامب

عندن بيوت خشبية بالطبيعة، مناظر طبيعية حلوة، ألعاب حماسية، وقعدات بين الصنوبر.

الرقم: 429 613 03 – 082 312 03

وما تنسوا تجربوا لقمة طيبة بمطاعم صوفر:

9. جربوا أطباق شهية مع منظر غروب الشمس عند مطعم ورق أصفر

بتلاقوا المطعم تحديداً على كورنيش صوفر، وبيطل على الوادي.

عندو أكل لبناني وعالمي وقعدة بتاخد العقل بالخريف.

الرقم: 036 063 71

10. دوقوا لقمة لبنانية طيبة مع منظر الوادي عند مطعم التلوج

عندن أطيب مشاوي لحمة ودجاج بصوفر، مع مناظر خريفية بترد الروح.

الرقم: 442 292 05 – 715 018 03

خبرونا بالتعليقات، حبيتوا مشوار الخريف بصوفر؟

شوفوا كمان، ٦ مطارح لأحلى مشوار خريف بجزين