مين هي الأيقونة اللبنانية وأول عارضة أزياء عالمية عربية؟ 

اليوم رح نعرفكن على أندريا عقوري، الأيقونة اللبنانية وأول عارضة أزياء عالمية عربية. العارضة اللبنانية اللي زينت عروض الأزياء العالمية، وحققت نجاح كبير بعالم الموضة والعالم العربي كله. 

من الصعب ما نحكي عن العصر الدهبي للأزياء بلبنان، وهو مجال كان مزدهر بالستينات، وانتج مواهب فنية محلية وعالمية. وأسست بيروت وجودها كمركز أزياء للمصممين والمصورين والعارضين مع لمستها التقليدية للأسلوب المودرن. (لتعرفوا المزيد عن تاريخ الأزياء في لبنان، شوفوا هون)

بمقابلة مع مجلة فوج العربية، بتخبرنا أندريا عقوري كيف بلشت الخبرية. بسنة ال 1962، كانت قاعدة عم تتغدا مع زوجة خيها بمطعم بسويسرا، وقرّب حكى معها مصمم مشهور قلب حياتها فوقاني تحتاني. 

وهيك بلش مشوارها بالمجال وصارت عارضة أزياء مطلوبة عالميًا من أكبر بيوت ودار الأزياء، متل ديور وشانيل وسان لوران. بالرغم من عدم خبرتها بالمجال أول ما بلشت، بس لقيت أندريا حالها مطلوبة ومدعوة على منصات وعروض أزياء عالمية.  

وحدة من اللحظات الأساسية بحياتها المهنية لما صارت عارضة وملهمة muse  لمصممة الأزياء الفرنسية نينا ريتشي الشهيرة. وحسب ما قالت المحررة الإدارية لمجلة فوج العربية جانين يزبك، “لعبت ريتشي دور مهم بمسيرتها المهنية. ما كانت عقوري مجرد عارضة أزياء للعلامة التجارية، بس صارت ملهمة أساسية بدار الأزياء وعارضة لسبع سنوات.” 

وبسبب إزدهار مجال صناعة الأزياء ببيروت، قررت عقوري تفتح مدرسة لعرض الأزياء، اللي التحقت فيها جورجينا رزق لما صارت بعمر الـ 14 عامًا (مصورة فوق). 

عقوري كانت معروفة بجمالها الساحر ووجودها المميز على مسارح وبعروض الأزياء العالمية. بتشاركن أكتر عن تجربتها وحياتها الشخصية على حسابها على الإنستغرام هون، بتلاقوا صور قديمة ولقطات عن رحلاتها حول العالم، ومقتطفات من أرشيفها ولحظات من مسيرتها المهنية كوحدة من أفضل عارضات الأزياء بالستينات بالعالم العربي والعالم. 

إذا حابين تقروا المقابلة كلها، شوفوا الرابط هون!

شوفوا كمان، من أرشيف الزمن الجميل، ١٦ صورة نادرة لجورجينا رزق