٥ كافيهات لازم تزوروهن بهل طقس الخريفي

وحدة من ألطف الأشيا عن اللبنانية هوي حبنا للقهوة والمشاوير الحلوة حتى بظل الأزمات والصعوبات لي عم نقطع فيها. وأكيد ما بيكمل نهارنا من دون فنجان قهوة، لهيك اليوم رح نخبركن عن كافيهات خريفية خرج كنكنة مع الأصحاب أو الحبيب. يلا مشوا معنا!

١. سكر نبات، عمشيت

قهوة مهضومة خرج قعدة أصحاب، بتحسوا حالكن ببيتكن قاعدين مع رفقاتكن عم تلعبوا وتضحكوا وتتسلوا. غير هيك، القعدة بيتوتية متل قعدة كافيهات الضيعة، فيها ألوان وصوفا وتكايات متل تبع التيتا. عندن أكلات خفيفة وحلويات، كوكتيلات وكريب وقصص بيتوتية بتستحلوها بهيك طقس.

الرقم: 679 624 09

٢. رصيف، طرابلس

عبالكن شي قهوة تتسلوا فيها؟ ترجعوا زغار وتضحكوا من قلبكن؟ هل كافي المهضوم رح يخليكن تحسوا بدفا الخريف وبدفا فنجان القهوة بيروق الراس. فيكن كمان تتحلوا بقطعة كيك مع فنجان قهوة أو تتروقوا وتبشلوا نهاركن ع المزبوط!

الرقم: 006 120 76

٣. قهوة بان Bun Coffee Shop، الحازمية

قهوة كتير مهضومة وقريبة على القلب، مش بس لأنها مكنكنة ومهضومة كمان قعدتها مريحة فيكن تلعبوا وتسولفوا إنتو رفقاتكن وتنسوا هموم الدني مع شفة قهوة، عصير أو نسكافي بتحسوا حالكن ببيتكن. فيكن إذا بدكن تاكلوا، تطلبوا سلطة أو كرواسون أو هيك قصص بسيطة مع قهوتكن المفضلة.

الرقم: 864 270 70

٤. كافي بدارو، بدارو

كافيه مهضوم عندو قعدة برا وجوا وأكل بشهي، وعلى العصرونية بتجربوا أطيب الحلويات والترويقة كمان بتشق القلب. من فنجان القهوة لبريق الشاي السخن، رح تتخبوا من الشتي وتدفوا قلبكن وتروقوا أعصابكن مع الناس لي بتحبوهن.

الرقم: 674 602 03

٥. كلاود كافي Cloud Coffee، جل الديب

قهوة مهضومة خرج قعدة أصحاب وعندن كل أنواع القهوة لي بتخطر على بالكن، باردة أو سخنة مع أكلات خفيفة وحلو. هل قعدة زغيرة ومهضومة بقلب المحل علاج للهموم، وصوت الموسيقى الرايقة بيجذبكن دغري وبخليكن تحسوا بدفا الخريف.

الرقم: 143 882 70

وانتو كمان، شو بتحبوا بعد كافيهات خريفية مجربينها؟

شوفوا كمان، ٥ محلات كوكتيل لازم تجربوها بلبنان.