٩ معاصر لتجربوا نبيد لبناني بين كروم العنب

لبنان مشهور بإنتاج النبيد المحلي، ومليان مزارع لكروم العنب ومصانع للنبيد اللبناني. شوفوا معنا مطارح مميزة بتلاقوا فيها نبيد لبناني طيب ومناظر خيالية لكروم العنب.

1. Domaine des Tourelles، سهل البقاع

Domaine des Tourelles بيقدم تجربة ممتازة لكل محبي نبيد لبناني! بتشمل زيارتكن جولة بالمعصرة، تمشاية بين الكروم، وتجربة تذوق خاصة للنبيد المحلي. وما بيكمل من دون ما تجربوا مع أطباق الجبنة المحلية والصفيحة البعلبكية.

لحجز زيارتكن، شوفوا هون.

2. Iris Domain، بحمدون

ناطركن تجربة خريفية روعة عند Iris Domain! بتتضمن جولة لتتعرفوا على تاريخ وصناعة النبيد المحلي. وبتختموا زيارتكن بأطباق محلية شهية وجو مكنكن على الآخر خصوصي على العشا، أو بقلب الجنينة عندن.

لحجز زيارتكن، شوفوا هون.

3. Chateau Kefraya، سهل البقاع

بيقدم شاتو كفريا جولة بين كروم العنب ومعاصر النبيد. فيكن تجربوا عندن النبيد المحلي، تشتروا نبيد معتّق، وكمان عندن مطعم بين الكروم غير شكل لتكمل تجربتكن مع الأطباق الشهية.

لمزيد من المعلومات، شوفوا هون.

4. IXSIR، بزبينا

توجهوا على IXSIR لجولة بالمعصرة وبين الكروم العنب لتتعرفوا على تاريخ الصناعة والزراعة. وبعد ما تخلصوا، جربوا أطيب أطباق تحت فيّ الشجر مع النبيد المحلي اللي بيعملوا.

لحجز زيارتكن، شوفوا هون.

5. Chateau Qanafar، خربة القنافر

معصرة ومصنع للنبيد مميز لعشاق النبيد على أنواعه، ولكل حدا عندو فضول يتعرف على هالصناعة الوطنية. بتبلشوا بجولة بين كروم العنب، وزيارة على المعصرة من جوا، وبتخلص بتجربة طعم النبيد الخاص فيهن.

لحجز زيارتكن، شوفوا هون.

6. Karam Wines، جزين

وحدة من أشهر معاصر النبيد بالجنوب، وإلها تاريخ عريق بالصناعة. عندن تجربة فريدة لكل محبي النبيد، جولة مميزة عندن بالمعصرة ومزرعة كروم العنب، وحتى أطباق محلية مميزة معمولة بطريقة بيتوتية.

لحجز زيارتكن،شوفوا هون. لحجز طاولتكن، شوفوا هون .

7. Chateau St. Thomas، قب الياس

عبالكن جولة نبيد مع غدا بوفيه يوم الأحد؟ هالمعصرة المميزة بالبقاع بتقدملكن تجربة روعة بالطبيعة، من تذوق نبيد بقاعي، قعدة بالطبيعة، وبوفيه غير شكل من أطباق من المنطقة.

لمزيد من المعلومات، اتصلوا على 813 500 08

8. Chateau Ksara، سهل البقاع

شاتو كسارا بيقدملكن جولتين مختلفين للنبيذ، جولة كلاسيكية بأي موسم بالسنة، وجولة موسعة لأكتر من ساعة بين كروم العنب والمعاصر التاريخية. وبعد ما تخلصوا، أكيد بتجربوا أكل طيب وأطباق مميزة من عندن بالمطعم مع نبيد كسارا المشهور.

لمزيد من المعلومات، اتصلوا على 495 813 08

9. Atibaia Winery، البترون

هالمطرح عبارة عن معصرة نبيد زغيرة ومطعم مميز بيقدم أطيب الأطباق مع النبيد. والأحلى من هيك انو عند قعدة بالطبيعة والهوا الطلق.

لمزيد من المعلومات، اتصلوا على 555 584 01

شوفوا كمان، هيك أسعار الدخولية على أشهر معاصر النبيد بلبنان