٥ محلات بحضروا ترويقة بيتوتية بالضيعة

مين عبالوا يبلش نهاروا بترويقة بلدية بسيطة وأكل بيتوتي بقلب الضيعة، وبين البرودات الحلوين وفيات الشجر وصوت العصافير؟ خلونا ناخدكن على ٥ محلات بحضروا ترويقة بيتوتية بالضيعة.

١. العرزال، حراجل

ترويقة بلدية ع طاولتكن من بطاطا مشوية ومناقيش وبيض عيون مع مشطاح صاج غير شكل وجبنة بيضا وراس بندورة جبلية، يعني كأنكن قاعدين ببيت الضيعة عم تاكلوا من حواضر البيت وتحسوا بطعمة كل كدشة. حتى القعدة بترد الروح بين الشجر وبقلب بيت خشب وما بتكمل ترويقتكن بدون فنجان شاي عم يغلي غلي وأغاني فيروز.

الرقم: 650 711 03

٢. فرن خير وبركة، فالوغا

قعدة الجبل ما بتكمل من دون ترويقة مألفة من مكونات بسيطة وبلدية، من مناقيش على الصاج وبيض وقاورما وسجق مع بريق شاي وصحن خضرا جبلية ولبنة وزيتون، وأكيد هوايات فالوغا والروقان لي ما في منو ببيروت.

الرقم: 505 548 70

٣. فوق الغيم، دير الأحمر

هون بتشموا ريحة الأرض وبتاكلوا كل لقمة من الجنينة. كل شي رح يخليكن ترتاحوا على الآخر من الأكل الطيب والبسيط لقعدة الخيمة المكنكنة. وأطيب شي صراحة رح تدوقوا هي منقوشة الصاج من تحت ديات نسوان الضيعة مع لقمة لبنة وكباية عصير فريش.

الرقم: 999 477 70

٤. ورد كافي تروتوار Ward Café Trottoir، حدث الجبة

كافيه مهضوم ومكنكن بدفي القلب. الكراسي عندو قش والقعدة رح تخليكن تحسوا بجمال الضيعة وراحة البال بكل تفاصيلها. الأكل بسيط ومحضر من البيت وفيه ريحة ورد. الترويقة لبنانية أصيلة وعلى البركة بتتقدم بالفخار وعندن كمان شراب ورد جبلي.

الرقم: 652 621 03

٥. دير الأمرا، دير القمر

هل محل تراثي بكل معنى الكلمة! رح يحسسكن إنكن رجعتوا بالزمن لفترة الأمرا المعنيي بجبل لبنان وقاعدين عم تتروقوا الصبح على هدا وتشربوا فنجان قهوتكن. هل محل بقدم ترويقة ملوكية ولو كانت بسيطة، بتكون أحلى صبحية مع أطيب لقمة بلدية ع صوت العصافير وميات البركة.

الرقم: 935 119 71

شوفوا كمان، ٦ محلات بيعملوا كنافة ملغومة جبنة.